د څوکۍ ولسوالۍ روزنتون کې د يو محراب مسجد د جوړيدو چارې پيل شوې
د کار او ټولنيزو چارو وزير بشير احمد ته ينج، مالي او اداري چارو مرستيال مسعودالله اورياخيل او ورسره مل پلاوي؛ په داسې کې چې د کنړ والي محمد اقبال سعيد يې هم ملتيا کوله؛ د کونړ ولايت څوکۍ ولسوالۍ ته سفر وکړ او يادې ولسوالۍ کې يې د څوارلس لکه افغانيو په ارزښت د روزنتون ديوال او د ياد روزنتون لپاره د پنځلس زره امريکايي ډالرو په لګښت د يو مسجد جوړيدو چارې پرانستلې.
د کار او ټولنيزو چارو وزير د خپلو خبرو په ترڅ کې د ياد روزنتون لپاره د سلام فونډيشن( بنسټ) د پنځلس زره امريکايي ډالرو په مرستې د يو مسجد جوړيدو څخه مننه وکړه او پر نورو پانګوالو يې هم غږ وکړ؛ څو هيواد کې د روزنتونونو او بې سرپرسته ماشومانو په پالنه کې همکاري وکړي.
ښاغلي ته ينج د روزنتون مسؤلينو او شاګردانو سره له نږدې خبرې وکړې؛ د هغوی ستونزې يې واوريدې او د ستونزو د حل ژمنه يې وکړه.
د ويلو دي، چې ياد روزنتون کې اوس مهال ۷۳ تنه يتيم او بې سرپرسته ماشومان روزل او ساتل کيږي، چې نن ورته د يونيسف ادارې په مالي مرسته ژمنۍ بستې هم و ويشل شوې.
