هوايي ډګرونو او ځمکنيو بندرونو کې، بهرنيو وګړو ته د کار جواز ويشلو د استازوليو جوړيدل اساسي اړتيا دی

دغه خبره د کار او ټولنيزو چارو وزارت سرپرست ملا عبدالولي څارنوال( حاجي وارث) بهرنيو وګړو ته د کار جواز رياست له لوري د يوې ملي طرحې وړاندې کولو ناسته کې وکړه. 
دې ناسته کې، بهرنيو وګړو ته د کار جواز ويشلو رئيس حافظ مولوي عبدالرحمن رحماني او همکارانو يې د يادې طرحې موضوعات د وزارت سرپرست سره شريک او پر هره ماده يې ورسره هر اړخيز بحث وکړ. 
د کار او ټولنيزو چارو وزارت سرپرست ياده طرحه اساسي اړتيا و بلله و يې ويل، چې د يادې طرحې پلي کېدل به د امنيت او بهرنيو وګړو ته د کار جواز ويشلو له درکه د ملي عوايدو په ډيرېدو کې هم ډيره ګټوره تمامه شي. 
د کار او ټولنيزو چارو وزارت سرپرست د يادې طرحې د جوړيدو څخه د خوښۍ په څرګندولو سره، د يادې طرحې د لا ښه سمون په موخه اړونده مسؤلينو ته لازمې لارښوونې او سپارښتنې وکړې. 
د ويلو دی، چې د کار او ټولنيزو چارو وزارت سرپرست څه موده وړاندې، يوې کاري کميټې ته دنده سپارلې وه؛ څو د وزارت اړونده مهمو برخو لپاره طرحې جوړې او د وزارت رهبرۍ سره شريکې کړي، چې له ښه مرغه د يادې کميټې له لورې شپږ ملي طرحې( کار را منځ ته کولو، د سوالګرۍ مخنيوي، په نشه يي توکو د روږدو کسانو را ټولولو او د هغوی د کاري وړتياوو بيرته ژوندي کولو، بهرنيو هيوادونو کې د افغان کارګرو د حقوقو خونديتوب، په هوايي ډګرونو او ګمرکونو کې بهرنيو وګړو ته د کار جواز ويشلو او اړونده برخو کې د ملي او نړيوالو سازمانونو د مرستونو جلبولو ملي طرحې) جوړې او د وزارت مقام ته وړاندې شوي، چې د وزارت د سرپرست له لوري تر کتنې او دقيق سمون وروسته به د رياست الوزرا عالي مقام ته واستول شي.