خوست کې ۸۸تنه ځوانان له فني او حرفوي زدهکړو فارغ شول
د خوست ولایت د کار او ټولنیزو چارو ریاست په هڅو د دې ولایت اړوند د فني او حرفوي زدهکړو له مرکز څخه د مرکز او اسمعیلخېلو ۸۸ تنه ځوانان د مبایل جوړولو او سولر برېښنا له شپږ میاشتنو عملي او نظري زدهکړو وروسته فارغ شول.
په همدې مناسبت جوړه شوې غونډه کې، چې د ولایت مختلفو اداري مسؤلینو، علمای کرامو، قومي مشرانو او د فارغو ځوانانو د کورنیو غړو حضور درلود، د خوست ولایت د کار او ټولنیزو چارو رئیس مولوي آمر صاحب جان حقاني فارغو شویو ځوانانو ته د مبارکۍ ویلو ترڅنګ د اسلام سپېڅلي دین په رڼا کې د کسب د اهمیت او ارزښت په اړه هر اړخیزه معلومات شریک او له فارغو شویو ځوانانو یې وغوښتل، چې په اړوندو حرفو کې د ګټورو خدماتو وړاندې کولو له لارې د خدمت جوګه شي.
ورپسې د بشر حقونو او رسنیو څار همکاری ادارې استازي په خپله لنډه وینا کې د خوست ولایت د کار او ټولنیزو چارو ریاست له ښې همغږۍ او رهبرۍ څخه په مننې سره فارغانو ته په ورځنیو چارو کې د لا بریاوو غوښتنه وکړه.
