د بلخ ولایت د خصوصي سکټور له مسوولینو سره د همغږۍ ناسته وشوه
د کار او ټولنیزو چارو وزارت، د کار چارو معین الحاج مولوي محمد زاهد احمدزي بلخ ولایت ته په خپل رسمي سفر کې د خصوصي سکټور له مسوولینو سره وکتل.
ناسته کې د دې ولایت د سوداګرۍ او پانګونې خونې رئیس محمد ابراهیم غضنفر مېلمنو ته د ښه راغلاست سربېره د دې خونې د فعالیتونو په اړه معلومات شریک او څرګنده یې کړه، چې توانېدلي دي ګڼ شمېر هېوادوالو ته د کوچنيو او سترو کارونو زمینه برابره کړي. نوموړي همداراز د کار اړوند تقنیني اسنادو د پلي کېدو او د کارګرو ایمني او حقوقو د رعایت کولو څخه ډاډ څرګند کړ او د کار بازار د اړتیاوو پېژندلو او همدې ته په کتو د فني او حرفوي زدهکړو د زمینې برابرولو او پر معاشاتو د مالیې د کمولو په برخو کې د پاملرنې غوښتنه درلوده.
ورپسې د کانونو او صنایعو د خونې رئیس امامالدین سنایي زاده په خپلو خبرو کې وویل: د دې خونې غړي توانېدلي چې په خپلو پانګونو سره د کارپنځونې ګڼ شمېر فرصتونه برابر او هم په اړوندو فابریکو کې دوو زرو بېرته راستنېدونکو ته د کار زمینه برابره او دې لړۍ ته به ادامه ورکوي.
په همدې ترتیب ځینو نورو پانګوالو هم په خپل وار خبرې وکړې او بهرنیو وګړو ته د کاري ویزو په ورکړه کې د آسانتیاوو د رامنځته کېدو، فابریکو ته د برېښنا د تأمین، د صنعتي ښارګوټي د ځمکو د وېش د پیل، د کار جوازونو په ورکړه کې د سهولت رامنځته کېدو او ځینو نورو برخو کې د اړوندو مسوولینو د پاملرنې غوښتنه درلوده.
د کار چارو معین الحاج مولوي محمد زاهد احمدزي هم خپله وینا کې څرګنده کړه: د عالیقدرامیرالمؤمنین حفظهالله تعالی د هدایت مطابق ټولې امارتي ادارې مکلفې دي، چې په خپلو کاري برخو کې خصوصي سکټور ته سهولتونه برابر او ورڅخه لازم ملاتړ وکړي او دا د حکومت له لومړیتوبونو څخه دي. د کار چارو معین زیاته کړه: خصوصي سکټور د حکومت ترڅنګ توانیدلی، چې له یوې خوا د هېواد د ځان بسیاینې او پرمختګ لپاره قوي ګامونه واخلي او له بلې خوا په خپله اډانه کې لوی شمېر بشري ځواک ته د کار زمینه جوړه کړي. د کار چارو معین د خپلو خبرو په دوام وویل، چې د امکان تر بریده دې هڅې وشي، ترڅو بېرته راستنېدونکو کډوالو ته د کارموندنې لپاره کار او د هغوی لاسنیوی وشي او هم دې د کار اړوند تقنیني اسنادو په پام کې نیولو سره د کار فرمایانو او کاریګرو ستونزې حل شي.
الحاج مولوي محمد زاهد احمدزي د خصوصي سکټور له استازو غوښتنه وکړه، چې په دندو کې دې کورنیو وګړو ته لومړیتوب ورکړل شي او که د اړتیا په صورت کې په تخنیکي برخو کې بهرني وګړي ګمارل کېږي نو د دوی په واسطه باید افغان ماهر کاریګر وروزل شي. همداراز یې ډاډ ورکړ، چې د کار او ټولنیزو چارو وزارت له سکتوري ادارو سره په تفاهم او مرسته توانیدلی، چې د بهرنیو وګړو د کاري ویزو د ورکړې په بهیر کې د پام وړ سهولتونه رامنځته کړي. په پای کې یې ژمنه وکړه چې په ناسته کې مطرح شوي وړاندیزونه به له اړوندو مسوولینو سره د حل په موخه تعقیبوي او هم به په راتلونکي کې د ورته ناستو زمینې برابروي.
د ویلو ده چې په دې سفر کې د وزارت د انسټیټوټ رئیس شریفالله شرافت او د کار چارو معینیت سلاکار مولوي محمد کریم حنفي د کار چارو د معین ملتیا کوي.
