په کار پورې اړوند روغتیایي زیان د خسارې د جبران په مقررې د بحث لومړنۍ ناستې ترسره شوه
د کار او ټولنیزو چارو وزارت مالي او اداري چارو مرستیال مولوي دین محمد حقبین په مشرۍ او د اړونده ادارو د استازو په ګډون په کار پورې اړوند روغتیایي زیان د خسارې د جبران په مقررې د بحث لومړنۍ ناسته وشوه.
ناسته کې لومړۍ د یادې مقررې د تاریخچې په اړه لنډو معلوماتو کې څرګنده شوه چې وروستی ځل په کار پورې د اړوند روغتیايي زیان د خسارې د جبران مقرره په ۱۳۹۸ کال کې په څلورو فصلونو او شلو مادو کې نافذه شوه او له هغې وروسته د تطبیق په موخه یې د کار او ټولنیزو چارو وزارت له لورې طرزالعمل هم چمتو شو خو په اړه یې عملي اقدام ونشو.
په یاده ناسته کې؛ په کار پورې د اړوند روغتیايي او جسمي زیان د خسارې د جبران د اندازې تثبیت او ټاکل، د خسارې جبران په ورکړې پورې د اړوندو چارو تنظیم، د خسارې د جبران د فیصدۍ ټاکل، د زیانمنشوې کارکوونکي د کار دتوان ټاکل او د ایمني تخنیک د نقضکوونکو د مسؤلیت او د کار چاپېریال د روغتیا ساتنې د قواعدو تشخیص او تثبیت د دې مقررې اصلي موخې په ګوته شوي.
ورپسې د افغانستان بانک او د عدلیې، مالیې او عامې روغتیا وزارتونو استازو چې په ناسته کې ګډون درلود پدې تړاو یې خپلې نظریې، وړاندیزونه او مشخص تعدیلونه شریک او د دې موضوع پر اهمیت یې خبرې وکړې او هم یې د خپلو اړونده ادارو د همکارۍ ډاډ ورکړ.
په پای کې د کار او ټولنیزو چارو وزارت د مالي او اداري چارو مرستیال پدې اړه د ګډونوالو هڅې او کوښښونه وستایل او پرېکړه یې ورکړه چې د وزارت اړونده ریاستونه دې د مقررې په مسوده بیاځلې کتنه وکړي او له هغې وروسته دې نورو ادارو سره شریکه کړي؛ ترڅو د هغوی غوښتنو او وړاندیزونو ته هم په کې ځای ورکړل شي.
