کابل کې سلګونه تنه له اعتیاد څخه رغېدلي اشخاص له فني او حرفوي زدهکړو څخه فارغ شول
د کار او ټولنیزو چارو وزارت اړوند د پلچرخي د فني او حرفوي زدهکړو له مرکز څخه په شپږمې ښوونیزې دورې کې ۳۰۰ تنه له اعتیاد څخه رغېدلي اشخاص؛ له څلور میاشتنیو نظري او عملي زدهکړو وروسته؛ په خیاطۍ، د تعمیراتو برېښنا، بوټګنډلو، بیګګنډلو او د کورنیو برېښنایي وسایلو ترمیم له حرفو څخه فارغ او تصدیقپاڼې ترلاسه کړې.
په همدې مناسبت جوړې شوې فراغت غونډې ته د کار او ټولنیزو چارو وزارت؛ د کار چارو معین الحاج مولوي محمد زاهد احمدزي په خپلو خبرو کې وویل: د خوښۍ ځای دی، چې نن د هېواد تر ټولو محروم قشر د فني او حرفوي زدهکړو پر ګاڼه له سمبالېدو وروسته د یو مسئول انسان او فرد په توګه ټولنې او خپلو کورنیو ته وړاندې کوو؛ چې له دې وروسته به یوازې پر ټولنې او کورنیو بوج نه وي بلکې د ماهر کارگر په توګه به د کار بازار ته وړاندې کېږي او خپلو کورنیو ته به د حلالې نفقې برابرولو مسؤلیت هم په غاړه واخلي.
مولوي احمدزي د خپلو خبرو په دوام زیاته کړه؛ د کار او ټولنیزو چارو وزارت توانېدلی، چې د کابل سربېره په نورو ولایتونو کې هم له اعتیاد څخه رغېدلو ۱۰۵۰۰ څخه زیاتو هېوادوالو ته تر دې دمه د فني او حرفوي زدهکړو زمینه برابره کړي. د کار او ټولنیزو چارو وزارت هوډمن دی، چې دا سلسله به په کمي او کیفي ډول د هېواد نورو ولایتونو ته هم وغځوي.
مولوي محمدزاهد احمدزي له فارغ شویو اشخاصو څخه غوښتنه وکړه؛ چې له ترلاسه شويو زدهکړو، تجربو او مهارتونو څخه په غوره ډول استفاده او خپلو کورنیو ته د حلالې نفقې د پيداکولو سبب وګرځي.
د غونډې په پای کې د کورنیو چارو وزارت د مخدره موادو پر وړاندې د مبارزې معینیت ملکي مرستیال مولوي عبدالرحمن قاسمي په خپلو خبرو کې په هېواد کې د کار او ټولنيزو چارو وزارت د فعالیتونو د ستاینې سربېره، د مخدره موادو د قاچاقو د مخنيوي په اړه یې خبرې وکړې او د ښارونو، کوڅو، کلیو او بانډو څخه د معتادینو راټولول، د هغوی درملنه او ورته د فني او حرفوي زدهکړو د زمینې برابرول یوه بریالۍ برنامه وبلله؛ چې په دې سره په زرګونه تنه ځوانان له هغې مستفید شوي دي.
د یادولو ده، چې په یاده فراغت غونډه کې د ټولنیزو چارو معین الحاج مولوي عبیدالله امینزاده او د وزارت نورو چارواکو هم حضور درلود.
