د بېکارۍ ستونزې ته رسېدنه مو لومړیتوب دی
د کار او ټولنیزو چارو وزارت، د کار چارو معین الحاج مولوي محمد زاهد احمدزي، پکتیا ولایت ته په خپل رسمي سفر کې له فني او حرفوي زدهکړو څخه د ځوانانو په فراغت غونډه کې ګډون او وینا وکړه.
په همدې مناسبت جوړې شوې غونډه کې د یاد ولایت د کار او ټولنیزو چارو رئیس قاري محمد رحیم نصرت مېلمنو ته د ښه راغلاست سربېره؛ د خپلو فعالیتونو، لاستهراوړنو او راتلونکو پلانونو په اړه معلومات شریک او څرګنده کړه، چې دا ریاست توانیدلی ګڼ شمېر ځوانانو ته د فني او حرفوي زدهکړو زمینه برابره او هغوی په مختلفو حرفو کې وروزي.
ورپسې د کار چارو معین الحاج مولوي محمد زاهد احمدزي وویل: د عالیقدر امیرالمؤمنین حفظهالله تعالی د ځانګړي هدایت او خپلو مسؤلیتونو ته په کتو له اړوندو ادارو سره په ګډه کار کوو، ترڅو په هېواد کې د بېکارۍ کچه راټیټه او ګڼ شمېر هېوادوالو ته په مستقیم او غیر مستقیم ډول د کار زمینه برابره شي او دا د افغانستان اسلامي امارت له لومړیتوبونو څخه دي، چې له ټولو هغو فرصتونو څخه سالمه ګټه اخیستنه وشي، چې پایله یې اقتصادي وده، ثبات او په خپل ځان اتکا وي.
الحاج مولوي محمد زاهد احمدزي د خپلو خبرو په دوام زیاته کړه: خوښ یم چې یو وار بیا مې د هغو ۱۶۰ تنو ځوانانو په فراغت کې ګډون وکړ چې د تېرو شپږو میاشتو په جریان کې توانیدلي مختلفو حرفو کې زدهکړې ترسره او د ماهرو کارګرو په توګه روزل شوې دي. همداراز یې څرګنده کړه، چې د کار او ټولنیزو چارو وزارت د ځانګړې پاملرنې له کبله د پکتیا ولایت موجوده سهم لوړ شوی او په همدې اساس ۲۵۰ تنه نور ځوانان د زدهکړو په موخه جذب شوي دي.
همداراز یې ډاډ ورکړ چې هڅې روانې دي، ترڅو په دې ولایت کې له اعتیاد څخه رغېدلو اشخاصو ته هم د ورته زدهکړو مرکز پرانېستل شي او د مختلفو حرفو د پراختیا له لارې دا لړۍ ولسوالیو ته هم وغځول شي.
ورپسې قومي مشر حاجی غني ګل هم په خپلو لنډو خبرو کې د کار او ټولنیزو چارو وزارت د هڅو او فعالیتونو څخه په مننې سره وویل: چې د پکتیا ولایت ولسونه د خپل نظام ترڅنګ دریدلي او ملاتړ یې کوي. همداراز یې په دې ولایت کې د صنعتي ښارګوټي د جوړېدلو، د مخابراتي شبکو د مکالماتو د بیو د ټیټوالي، د مؤسساتو د فعالیت د پراخېدو او له بېرته راستنېدونکو څخه د ملاتړ په برخه کې د مسوولو مقاماتو د پاملرنې غوښتنه وکړه، چې د کار چارو معین لخوا ډاډ ورکړل شو، چې یاد موارد به په مرکز کې له اړوندو ادارو سره شریکوي.
په پای کې د کار چارو معین او مېملنو لخوا پر فارغو شویو ځوانانو د فراغت سندونه توزیع او په راتلونکي کې ورته د بریاوو هیله مندي وشوه.
