په هېواد کې د بېکارۍ يو له لوی عامل ناامني دی.
د کاري چارو مرستيال سيدعبدالکريم هاشمي، په افغانستان کې د کارموندنې خصوصي شرکتونو ټولنې پرانست غونډه کې وويل: په کور دننه د کار موندنې لپاره د کار قوه، کرنيز فرصتونه، کانونه، خام مواد او هر ډول نور امکانات لرو؛ اما بدبختانه يو لوی عامل چې په هيواد کې د دې ټولو مخه يې نيولې او د بېکارۍ سبب ګرځيدلې، ناامني دی.
ښاغلي هاشمي دې ناسته کې د کارموندنې خصوصي شرکتونو اړوند وويل چې تر دې مهاله د کارموندنې ۷۲ خصوصي شرکتونه د کار جوازونه تر لاسه کړي دي، چې د کار او ټولنيزو چارو وزارت سره به په همغږۍ کار کوي او هغه شرکتونه چې د کار جواز و نه لري، په هيڅ صورت به دې ملي پروسه کې فعاليت و نه کړي.
نوموړي زياته کړه، چې تر دې مهاله ۱۴ هيوادونو له افغان حکومت څخه د مسلکي کارګرانو غوښتنه کړې ده، چې د کار او ټولنيزو چارو وزارت د يادې ملي پروسې د پيل په موخه د بهرنيو چارو وزارت او نورو اړوندو ادارو سره بهر ته د کارګرانو د رسمي ليږد او هوکړه ليکونو د هر څومره ژر لاسليک کولو پر سر کار کوي.
د کاري چارو مرستيال وويل: هغه کارګران چې د دې ملي پروسې له لارې بيرونيو هيوادونو ته ليږل کيږي، د ټولو کاري حقوقو( د ژوند او کار بيمه) څخه برخمن کيږي.
د کارموندنې خصوصي شرکتونو ټولنې مشر نورالله فداوي بيا د خپلو خبرو په ترڅ کې د کار جواز ور کولو او همکارۍ په برخه کې د کار او ټولنيزو چارو وزارت څخه مننه و کړه او د خصوصي سکتور له مسؤلينو يې و غوښتل، چې د مسلکي کارګرو روزلو ته زياته پاملرنه و کړي، څو د يادې ملي پروسې د رسمي پيل سره سم په کافي اندازه مسلکي او د بيرونيو هيوادونو د کار بازار مطابق کارګرو و لرو.
ښاغلي فداوي ژمنه و کړه، چې ياده ملي پروسه کې به د کار او ټولنيزو چارو وزارت سره په ښه همغږۍ کار و کړي.
د کارموندنې خصوصي شرکتونو ټولنې پرانست غونډه کې د ارشاد حج او اوقافو سرپرست محمد قاسم حليمي او د خصوصي شرکتونو ځينو استازو هم خبرې و کړې؛ دوی د کارموندنې برخه کې د کار او ټولنيزو چارو وزارت له هڅو او د يادې ټولنې د پرانستې څخه خوښي و ښوده او له خصوصي سکتور مسؤلينو يې و غوښتل چې د ظرفيت لوړولو برخه کې زياته هڅه وکړي؛ څو افغان کارګر بهر له هيواده د نورو هيوادونو کارګرو سره د ښې کاري سيالۍ جوګه شي.
