د بې سرپرسته ماشومانو روزنه او پالنه زموږ ټولو اېماني او وجداني دنده ده
دغه خبرې د کار او ټولنيزو چارو وزير بشير احمد ته ينج؛ ننګرهار کې د روزنتونونو او بې سرپرسته ماشومانو سره د مرستې په پار جوړه شوې غونډه کې و کړې.
نوموړي وويل، چې ولايتونو ته يې له سفرونو څخه موخه د ولايتي رياستونو له چارو څخه له نږدې ليدنه او په ښه توګه ستونزو ته د حل لارو چارو موندل دي.
بشيراحمد ته ينج د خپلو خبرو په ترڅ کې وويل، چې د ننګرهار ولايت د کار او ټولنیزو چارو روزنتون د متوسطې لیسه کېدو، شینوارو او روداتو ولسوالیو کې د روزنتونونو فعالېدو او د نجونو لپاره د ځانګړي مرکز جوړیدو برخو کې به هم هڅه وکړي.
ښاغلي ته ينج د مرسته کوونکو مؤسسو له همکاريو مننه وکړه او د بې سرپرسته ماشومانو پالنه يې د ټولو هيوادوالو اېماني او وجداني دنده ياده کړه؛ پر شتمنو او سوداګرو يې غږ وکړ، چې دې برخه کې زياته پاملرنه وکړي.
د ولسمشر سلاکار او د ننګرهار والي ضياالحق امرخيل د کار او ټولنيزو چارو وزير او رهبري پلاوي ته د ښه راغلاست ترڅنګ د خپلو خبرو په ترڅ کې وويل، چې جنګ جګړو په هيواد کې ډير ماشومان يتيمان او ميرمنې کونډې کړي دي؛ نوموړي هم پر سوداګرو او هيوادوالو غږ وکړ، څو د دې قشر لاسنيوی او مرسته وکړي.
غونډه کې د ننګرهار ولایت د کار او ټولنیزو چارو ریاست رئیس عبدالحکيم شيرزاد د خپلو خبرو په ترڅ کې د وزارت رهبرۍ سره د یاد ولایت د کار او ټولنیزو چارو ریاست لاسته راوړنې، ستونزې او خپل وړاندیزونه شریک او د ستونزو د حل غوښتنه یې و کړه.
دې غونډه کې د ننګرهار ولايتي شورا استازي اسرارالله مراد، د ارشاد حج او اوقافو رييس مولوي محمد داوود مجاهد، قومي مشر حاجي سيدالرحمن مومند او د صنعتکارانو په استازيتوب شريفې احمدزۍ هم خبرې وکړې؛ دوی د خپلو خبرو په ترڅ کې د ياد مرکز پرانسته ګټور ګام ياد کړ او د وزارت رهبرۍ څخه يې و غوښتل، څو د روزنتونونو، فني او حرفوي زده کړو مرکزونو او کار رامنځ ته کولو برخه کې هم جدي کار وکړي.
د ويلو دی، چې د دې غونډې په پای کې د يونسيف ادارې په مالي مرسته د يتيمانو کورنيو سره د ۱۱۰ بستې ژمنيو توکو چې هره بسته کې شل قلمه البسه او اړين توکي شامل وه، مرسته و شوه.
