د کار چارو معین د افغانستان لپاره د کار نړیوال سازمان له رئیس سره وکتل
د کار او ټولنیزو چارو وزارت د کار چارو معین الحاج مولوي محمد زاهد احمدزي د خپل کار په دفتر کې په افغانستان کې د کار نړیوال سازمان له رئیس ټیټيهبیاکاري سره د کاري اړیکو په پراختیا، د کاري فرصتونو د رامنځته کولو او د کارګرانو او کارکوونکو د حقونو د خوندیتوب پر څرنګوالي خبرې وکړي.
په پیل کې د کار چارو معین مېلمنو ته د ښهراغلاست ترڅنګ زیاته کړه، چې د کار او ټولنیزو چارو وزارت هڅه کوي، چې د همکارو ادارو سره په همغږۍ د ملي او نړیوالو معیارونو په رڼا کې د کار په برخه کې اغېزمن ګامونه پورته کړي.
همداراز مولوي احمدزي د خبرو په دوام په افغانستان کې د کار نړیوال سازمان له رئیس ښاغلي ټیټيهبیاکاري وغوښتل چې د کار او ټولنیزو چارو وزارت د اصولو په نظر کې نیولو او له یاد وزارت سره په همغږۍ خپلو همکاریو ته پراختیا ورکړي.
ورپسې په افغانستان کې د کار نړیوال سازمان رئیس ټیټي هیباکاري، په مختلفو برخو کې د کار او ټولنیزو چارو وزارت له فعالیتونو څخه خوښۍ څرګنده کړه او د دې سازمان د فعالیتونو، لاستهراوړنو او برنامو په اړه د معلوماتو شریکولو ترڅنګ د کارورکوونکو او کارګرانو د حقوقو د تأمین، مصئونه کاري شرایطو برابرولو او ټولنیز عدالت په موخه هر اړخیزې خبرې وکړې او په افغانستان کې د کاري شرایطو د بهبود او کارموندنې په برخو کې د کار او ټولنیزو چارو وزارت وروستي فعالیتونه او هڅې وستایلې.
په پای کې، دواړو لورو لخوا د دوامدارو اړیکو، منظمې همغږۍ او د ګډو ناستو د ترسره کېدو پر اړتیا ټینګار وشو او هوکړه وشوه چې د همکاريو د پیاوړتیا لپاره به په ګډه عملي ګامونه پورته کړي.
د یادولوده، چې په یاده ناسته کې، د بهرنیو اړیکو رئیس حافظ محمد یوسف امین، د تقنین او کار حقوقو رئیس بشیراحمد راسخ، د فني او حرفوي زدهکړو د انسجام او همغږۍ رئیس ملا عبدالغني وفا، د فني او حرفوي زدهکړو د مراکزو د تنظیم رئیس مولوي عبدالواحد فایز او د افغانستان د کارګرانو او کارکوونکو ملي ټولنې رئیس الحاج مولوي عبدالمتین مولويزاده، هم حضور درلود.
