د کار او ټولنیزو چارو سرپرست وزیر الحاج ملا عبدالمنان عمري، د خپل کار په دفتر کې د فدراتیفې روسیې سفیر دیمتري ژیرنوف او له هغه هېواد څخه د اقتصادي او تجارتي مشاور نیکولای ساژنوف په مشرۍ راغلي پلاوي سره وکتل.

کتنه کې الحاج ملا عبدالمنان عمري افغانستان ته د یاد پلاوي د سفر هرکلی وکړ او د دواړو هېوادونو ترمنځ یې د ښو کاري اړیکو څخه په یادونې سربېره وویل: د افغانستان اسلامي امارت د سیمې او نړۍ له هېوادونو سره د متقابل احترام او ملي ګټو په پام کې نیولو سره د نېک تعامل غوښتونکی دی او له نېکمرغه همدې اصل ته په کتو توانیدلی دی، چې د سیاسي اړیکو د ټینګښت سربېره؛ په اقتصادي او تجارتي برخو کې هم له ګڼو هېوادونو سره ښې اړیکې ورغوي. الحاج ملا عبدالمنان عمري د خپلو خبرو په دوام زیاته کړه: افغانستان کې د بشپړ امنیت تأمین سره کورنیو او بهرنیو پانګه‌والو ته دا فرصت برابر شوی دی، چې هغوی دې دلته پانګه‌اچونه ترسره کړي.

د کار او ټولنیزو چارو سرپرست وزیر په سیمه کې د فدراتیفې روسیې ارزښت او اهمیت ته په اشارې سره، هیله وښوده، چې په روسیه کې به افغاني کرنیزو محصولاتو ته مناسب بازار برابر شي او همدارنګه د دواړو هېوادونو ترمنځ په مختلفو برخو کې شته اړیکې لا پراخې او هم دې د یاد هېواد جمهوریتونو ته د افغان کاریګرو د اعزام پروسې په برخه کې دواړه لوري کاري-تخنیکي ګروپونه مشخص کړي ترڅو یو مشترک تفاهم ته ورسېږو.

د فدراتیفې روسیې سفیر دیمتري ژیرنوف خپلو خبرو کې څرګنده کړه، چې د افغانستان او د روسیې ترمنځ د سوداګرۍ په برخه کې ښه پرمختګونه شوي او د سوداګرۍ کچه په لوړیدو ده او ژمن یو په دې برخه کې نه یوازې دا، چې روسي پانګه‌وال وهڅوو ترڅو دلته پانګه‌اچونه وکړي؛ بلکې افغان سوداګرو ته به هم مناسب سهولتونه رامنځته کوو. نوموړي همداراز د ټرانزیټ په برخه کې د همکارۍ ډاډ څرګند کړ.