د کار او ټولنیزو چارو وزارت د ولایتي رئیسانو لپاره د کاري سمون او همغږۍ درې ورځنی سمینار جریان لري
د کار او ټولنیزو چارو وزارت د مالي او اداري چارو مرستیال مولوي دین محمد حقبین په داسې حال کې چې د وزارت مقام د دفتر رئیس ملا شرف الدین شرف او ځينو نورو رئیسانو هم ګډون درلود، د دې وزارت د ولایتي رئیسانو لپاره د کاري سمون او همغږۍ درې ورځنی سمینار پرانیست.
مولوي دین محمد حقبین خپلو خبرو کې د کار او ټولنیزو چارو ولایتي رئیسانو ته ښه راغلاست ووایه او د دې سمینار د ارزښت او موخو په اړه یې توضیحات ورکړل همداراز يې څرګنده کړه: د دې وزارت مسؤلیتونه درانه او زيات دي چې باید ټول په ګډه خپلې دندې او مکلفیتونه په بشپړې همغږۍ او همکارۍ ترسره کړو او خپلو ولسونو ته لازم او د پام وړ خدمات ترسره کړو. مولوي حقبین د کار او ټولنیزو چارو وزارت له ولایتي رئیسانو وغوښتل چې د خپلو دندو پر مهال دې ټولو ولایتي ادارو سره نږدې اړیکې ولري او پخپلو چارو کې دې د اطاعت پذیرۍ اصل په بشپړه توګه عملي کړي، د دې ترڅنګ دې اجازه نه ورکوي چې په کارونو کې یې غیر قانوني مداخله وشي.
ور پسې د وزارت مقام د دفتر رئیس ملا شرف الدین شرف د یوه پريزنټېشن له لارې د دې ریاست د مسؤلیتونو، عمده فعالیتونو، لاسته راوړنو او هم ځينو خنډونو په اړه د سمینار ګډونوالو سره معلومات شریک او له دوی یې وغوښتل چې پر وخت سره دې د خپلو کړنو او اجراآتو څخه راپورونه د دفتر ریاست سره شریک کړي، چې په اړه یې قانوني اقدام وشي.
په همدې ترتیب د تهیې او تدارکاتو رئیس مولوي عبدالمتین مولوي زاده، د پالیسۍ او پلان رئیس مولوي محب الله او د نظارت او ارزونې رئیس مولوي نجیب الله وقاد هم د خپلو اړوندو ریاستونو د وظیفوي مسؤلیتونو او فعالیتونو په اړه د پریزنټېشنونو له لارې هر اړخیز معلومات شریک او وړاندې کړل.
د یادولو ده چې یاد درې ورځنی سمینار به د چهار شنبې تر ورځ دوام و مومي او د کار او ټولنیزو چارو وزارت مرکزي رياستونه به پخپل وار د خپلو کړنو په هکله معلومات شریک کړي.
