په پکتیکا، بلخ او تخار کې له ۱۱۲۲ تنو بېوزلو، زیانمنو او یتیمو ماشومانو سره د ژمنیو توکو مرسته وشوه

د پکتیکا، بلخ او تخار ولایتونو د کار او ټولنیزو چارو ریاستونو په هڅو او همغږۍ د یاد ولایاتو په مرکز او ولسوالیو کې ۱۱۲۲ تنو زیانمنو، بېوزلو او یتیمو ماشومانو سره، د ژمنيو توکو مرسته وشوه.
 په یادو ماشومانو کې ۵۰۲ تنه د پکتیکا، ۴۷۳ تنه د بلخ او ۱۴۷تنه د تخار اوسېدونکي وو او د بېلابېلو ټولنیزو او اقلیمي شرایطو او اړتیاوو پراساس یې مرستې ترلاسه کړې.
 په یادو مرستو کې کمپلې، جمپر، خولۍ، جاکټ، دستکش، جرابې، بوټان او نور توکي شامل وو.
په پای کې د کار او ټولنیزو چارو ولایتي ریاستونو له همکارو مؤسساتو څخه د مننې سربیره، له نورو مرستندویه بنسټونو او مؤسساتو څخه هم د مرستو او همکاریو غوښتنه وکړه. 
د یادونې وړ ده، چې یاد توکي د سرف‌- افغانستان او بشري خیریه مؤسسو په مالي همکارۍ ووېشل شول