ننگرهار او لغمان ولایتونو کې ۶۲۵ تنو یتیمو او بېسرپرستو ماشومانو سره د ژمنیو جامو مرسته وشوه
د ننګرهار او لغمان ولایتونو د کار او ټولنیزو چارو ریاستونو په هڅو او همغږۍ، د جلالآباد ښار د اتمې ناحیې اړوند ۴۰۰ تنو یتیمو او بېسرپرستو ماشومانو او همداراز، په لغمان ولایت کې ۲۲۵ تنو یتیمو او بېسرپرستو ماشومانو ته د ژمنیو جامې،جمپر، بوټ، جرابې او خولۍ، ووېشل شوې. د یادو مرستو د وېش پر مهال د ننګرهار او لغمان ولایتونو د کار او ټولنیزو چارو رئیسانو، د اکتید او هدف موسسو له مننې سربېره وویل: اړینه ده چې د هېواد یتیمو او بېسرپرستو ماشومانو ته د سالمې ښوونې او روزنې لپاره، د هغوی ملاتړ او لاسنیوی وشي، تر څو دوی د یوه روښانه راتلونکي پر لور وخوځېږي. همداراز د کار او ټولنیزو چارو ریاستونوله ملي او نړیوالو مؤسسو او خیریه مرستندویو بنسټونو هم وغوښتل، چې په ژمي کې خپل مرستندوی فعالیتونه هممهاله پراخ او چټک کړي. د یادولو ده، چې د اکټید موسسې د ختیځ زون مسؤل انجینیر محمد شفیق یوسفي، په افغانستان کې د خپلو فعالیتونو په هکله د معلوماتو وړاندې کولو ترڅنګ د پروژې په تطبیق کې د کار ټولنیزو چارو ریاست د مسؤلینو د ښې همغږۍ او همکارۍ څخه مننه وکړه.
