د هر حکومت په ځان بسياينه د ځواکمنو او مسلکي کادرونو ځوانانو پورې تړلې
دغه خبره د کار چارو مرستيال مولوي مخدوم عبدالسلام سعادت د افغان ـ کوريا د فني او حرفوي زده کړو انستيتيوت کې د نوي ښوونيز کال پرانست غونډه کې وکړه.
د کار چارو مرستيال مولوي مخدوم عبدالسلام سعادت د افغان ـ کوريا انستيتوت د ۱۴۰۱ ښوونيز کال پرانست غونډه کې وويل، چې د کار او ټولنيزو چارو وزارت د ټولو ادارو ترمنځ يو اساسي او محوري وزارت دی؛ موږ په دې هڅه کې يو؛ څو د يوې مهمې او اساسي ادارې په توګه د نورو ادارو په همکارۍ په هېواد کې د بېوزلۍ، او بې روزګارۍ کچه کنټرول او ختمه کړو.
مولوي مخدوم زياته کړه: کار د اسلام په مبارک دين کې خاص ځای او ارزښت لري؛ نوموړي همدارنګه د کار را منځ ته کول او بې وزلۍ له منځه وړل د حکومتونو په ټينګښت کې يو مهم اساس ياد کړ و يې ويل، چې بيکاري او بېوزلي ده، چې د حکومتونو اساس نړوي او له منځه يې وړي؛ نو اړينه ده، چې په ټول توان او په ګډه د کارموندنې او فقر له منځه وړلو لپاره هڅې وکړو.
په دې ناسته کې د کار او ټولنيزو چارو وزارت د مالي او اداري چارو مرستيال مولوي دين محمد حقبين هم د اسلام مبارک دين له نظره د کار او مسلک اړوند خبرې وکړې او شاګردان يې خپلو درسونو ته تشويق او متوجه کړل.
د نوي ښوونيز کال پرانست غونډه کې د وزارت مقام د دفتر رئيس مولوي شريف الله، د مهارتونو د پراختيا رئيس مولوي عبدالولي، بهرنيو اتباعو ته د کار جواز ويشلو رئيس مولوي عبدالرحمن او د افغان ـ کوريا د فني او حرفوي زده کړو انستبتوت امر غلام فاروق هم خبرې وکړې او د نوي ښوونيز کال د پيل او د اسلام مبارک دين په رڼا کې د زده کړو پر ارزښت يې هر اړخيزې خبرې و کړې.
د ويلو دی، چې نوي ښوونيز کال کې د افغان ـ کوريا انستيتوت ته ۵۳۰ تنه شاګردان جذب شوي، چې د شپږو مياشتو او يو کال په بهير کې به په اوو مختلفو څانګو کې تر روزنې وروسته ټولنې ته د خدمت په موخه وړاندې شي.
