ننګرهار کې ۱۵۰ اړمنو کورنیو ته د څه باندې ۲.۵ میلیونه افغانیو په ارزښت د کوچنیو کاروبارونو زمینه برابره شوه
د ننګرهار ولایت د کار او ټولنیزو چارو ریاست په هڅو او همغږۍ؛ د یاد ولایت اړوند کوټ، بټيکوټ او مومندرې ولسوالیو کې ۱۵۰ اړمنو کورنیو ته د ۲۵۳۱۸۸۰ افغانیو په ارزښت د کوچنیو کاروبارونو د رامنځته کولو په موخه د خیاطۍ، دوکاندارۍ او د چرګانو فارمونو اړوند کاري وسایل او توکي ووېشل شول.
د توکو د وېش پر مهال د ننګرهار ولایت د کار او ټولنیزو چارو رئیس مولوي فریدالله حقاني د اسلام مبارک دین له نظره د کسب او کار د ارزښت سربېره له مستفدینو څخه وغوښتل، چې له ترلاسه شویو وسایلو څخه په استفادې خپلو کورنیو ته حلاله نفقه پیدا کړي او خپل کاروبار ته پراختیا ورکړي.
همداراز نوموړي د ټيډيایچ نړیوالې مؤسسې څخه د مننې ترڅنګ له نورو ملي او همکارو نړیوالو موسساتو او خیریه مرستندویه بنسټونو څخه هم د ورته مرستو او همکاریو غوښتنه وکړه، ترڅو د اړمنو او بېوزله کورنیو لاسنیوی او ملاتړ وکړي.
