د راستنېدونکو هېوادوالو لپاره د کاري فرصتونو د ایجاد کمېټې نوبتي ناسته تر سره کړه
د کار او ټولنیزو چارو وزارت؛ د کار چارو معین الحاج مولوي محمد زاهد احمدزي په مشرۍ د راستنېدونکو مهاجرینو لپاره د کاري فرصتونو د ایجاد په موخه کمېټې ناسته، چې د صنعت او سوداګرۍ، د کرنې، اوبولګولو او مالدارۍ ، د کډوالو او بېرته راستنېدونکومهاجرینو او اقتصاد وزارتونو استازو شتون درلود تر سره شوه. په پیل کې د کار چارو معین په خپلو خبرو کې وویل: له ګاونډیو هېوادنو څخه راستنېدونکي هېوادوال له ډېرو اقتصادي ستونزو او ننګونو سره مخامخ دې، چې د هغوي د باثباته ژوند د پرمخ بیولو لپاره دوامداره د عوایدو سرچینو، سرپنا د اوسېدو ځای او په هېواد کې ورته د کاري فرصتونو او په ورته وخت کې باید هغو ته د فني او حرفوي زدهکړو زمینه هم برابره شي، ترڅو خپل ستونزې حل او په آرامه فضا کې ژوند تېرکړي. همداراز مولوي احمدزي زیاته کړه، چې راستنېدونکي هېوادوال زموږ د ټولنې مهمه برخه جوړوي، موږ د همکارو ادارو سره په همغږۍ مکلف یو، چې د هغوی د باثباته ژوند لپاره کار وکړو. همداراز مولوي محمد زاهد احمدزي د خپلو خبرو په دوام زیاته کړه، چې د هرات، ننګرهار او قندهار سربېره په نورو ولایتونو کې هم راستنېدونکو هېوادوالو ستونزو ته په وخت سره د رسېدلو په موخه به کمېټې ایجاد شي. په پای کې د همکارو مختلفو ادارو استازو هم په خپلو خبرو کې د کار او ټولنیزو چارو وزارت د هڅې وستایلې او زیاته یې کړه، چې د کار او ټولنیزو چارو وزارت سره په مؤثره همغږۍ به د بېرته راستنېدونکو هېوادوالو ستونزو ته رسېدنه وکړو او د کار پنځونې په برخو کې به خپل مسئولیت په پوره ډول اداء کړو.
