د نړۍ ښایست او ټولنې پرمختګ د کارګرو د زحمتونو پایله ده.
دغه خبرې د کار او ټولنیزو چارو وزیر بشیر احمد ته ینج؛ د کارګر نړیوالې ورځې ( د مې اوله) په ویاړ جوړه شوې ناسته کې و کړې.
کار او ټولنیزو چارو وزارت کې د کارګرو نړیوالې ورځي په پار جوړې شوې غونډې ته؛ د افغانستان اسلامي جمهوري دولت ولسمشر محمد اشرف غني پيغام هم را لیږل شوی وه، چې د کار او ټولنيزو چارو وزارت د اطلاعاتو او نشراتو رئيس محمد يونس صديقي له خوا و لوستل شو؛ ښاغلي ولسمشر په خپل پيغام کې د کارګرو نړیوالې ورځې مبارکۍ ترڅنګ د هغوی له زحمتونو څخه مننه کړې وه او په هېواد کې يې د کارګرو پر وظيفوي خونديتوب او هغوی ته د لازمو خدمتونو پر وړاندې يې ټينګار کړی وه.
غونډه کې د کار او ټولنیزو چارو وزیر بشیر احمد ته ینج؛ د خپلو خبرو په ترڅ کې د ټولنې پرمختګ او سمون برخه کې د کارګرو ونډه اړینه و بلله او د هغوی د حقوقو پر تامینولو یې ټینګار و کړ.
بشیر احمد ته ینج و ویل: د افغانستان اسلامي جمهوري دولت په ځانګړې توګه د کار او ټولنیزو چارو وزارت تل د کارګرو ملاتړ او خوندیتوب ته ژمن او هڅه کوي، د مختلفو لارو چارو د کارګرو ستونزو ته رسیده ګي و کړي.
ښاغلي ته ینج زیاته کړه، چې له ښه مرغه د خسارې جبران مقرره نهایي شوې، چې د یادې مقررې پر عملي کیدو سره به د کارکوونکو یو سلنه معاش د دولت يو ځانګړي بودجوي کود ته را ټول او د کارکوونکو د متضرر کیدو په صورت کې به یې د خسارې جبرانولو په موخه ور کوي.
دې ناسته کې د کاري چارو مرستیال محمد اجمل شاه پور هم خبرې و کړې، و یې ویل: لکه څنګه چې یو هیواد کې اردو او پولیس ډیر اړین او د وطن څخه ساتنه کوي، همدارنګه کارګر هم د هیواد یو مهم قشر دی، چې د خپل قلم او مټو په زور وطن جوړ او ښایسته کوي او دا زموږ مسؤلیت دی، چې د حقوقو د خوندیتوب په پار یې هڅه و کړو.
د کارګرو نړيوالې ورځې نمانځنې غونډه کې د کار نړیوال سازمان مشر رامین بهزاد او د کارګرو صنفي ټولنې مرکزي شورا غړي کاکو جان نیازي هم خبرې و کړې؛ دوی ورکوونکو( کارفرمايان) ته د کار زمینې برابرولو برخه کې د حکومت همکاري اړینه و بلله او و يې ويل که چيرته کار ورکوونکو ته زمينه برابره شي، د پانګونې له لارې به ګڼ شمير نورو هيوادوالو ته د کار زمينه برابره کړل شي.
په ناسته کې د کارګرو په استازیتوب محمد نسیم کلکاني هم خبرې و کړې، د کارګرو ستونزې يې د وزارت رهبرۍ سره شریکې او د ستونزو د حل غوښتنه یې و کړه.
د ویلو دی، چې څو لسيزيزې وړاندې د امریکا متحده ایالاتو، شیکاګو ښار کې د کارګرانو له خوا د خپلو حقونو د خوندیتوب په اساس مظاهره و شوه، چې په پایله کې یې ګڼ شمیر شګنجه او متضرره هم شول؛ خو په پایله کې یې خپل حقوق تر لاسه کړل، چې له همغې ورځې را هیسې د ( مې) میاشتې اوله نیټه کارګرانو ته د درناوي په موخه په ټوله نړۍ کې لمانځل کیږي.
