دیدار وزیر کار و امور اجتماعی با سفیر اوزبیکستان مقیم کابل
بشیر احمد تهینج؛ وزیر کار و امور اجتماعی با خواجه شادمانوف سفیر اوزبیکستان در کابل دیدار کرد.
دراین دیدار که محمد اجمل شاهپور معین امور کار نیز حضور داشت، هر دو جانب روی همکاریهای کشور اوزبیکستان با وزارت کار و امور اجتماعی صحبت نموده، آقای تهینج از سفیر کشور دوست اوزبیکستان تقاضا نمود تا در ایجاد و ساخت و ساز انستیتیوت آموزشهای فنی و حرفهای افغان-اوزبیک و بخشهای آموزشی فنی و حرفهای این وزارت که دارای تجارب اند همکاری نماید.
سفیر اوزبیکستان درموارد یادشده وعدهٔ همکاری سپرده، تأکید کرد که افغانستان و اوزبیکستان همچون دوکشور دوست و باهم برادر با داشتن علایق نیک فرهنگی، سیاسی، اقتصادی و بازرگانی میتوانند همکار خوب در بخشهای گوناگون باشند.
سفیر اوزبیکستان، به وزیر کار و امور اجتماعی وعده داد که زمینهٔ سفر یک گروه تخنیکی وزارت کار و امور اجتماعی را به کشور اوزبیکستان به منظور دیدار از بخشهای تخنیکی و صحبت با مسوولان کشور اوزبیکستان را فراهم میسازد تا زمینهٔ همکاریهای دوجانبه، بیشتر از پیش فراهم گردد.
در پایان هردوطرف روی همکاریهای دوجانبه و تسهیل روند کاری میان دو کشور تأکید کردند.
