د افغانستان لپاره د اوزبيکستان سفير سره د کار او ټولنيزو چارو وزير ليدنه
د کار او ټولنيزو چارو وزير بشير احمد ته ينج په داسې حال کې چې د کاري چارو مرستيال محمد اجمل شاه پور هم حضور درلود، د افغانستان لپاره د اوزبيکستان سفير خواجه شادمانوف سره و کتل.
دې ليدنه کې دواړو لوريو له کار او ټولنيزو چارو وزارت سره د اوزبيکستان هيواد پر همکارۍ خبرې وکړې؛ ښاغلي ته ينج د اوزبيکستان سفير څخه و غوښتل؛ څو د کار او ټولنيزو چارو وزارت سره د فن او حرفې برخه کې همکاري وکړي او لکه د افغان ـ کوريا انستيتوت په څير د افغان ـ اوزبيک انستيتوت جوړولو کې همکاري او مرسته و کړي.
د اوزبيکستان سفير د خپلو خبرو په ترڅ کې، افغانستان او اوزبيکستان دوه دوست هيوادونه ياد کړل او د فرهنګي، سياسي، اقتصادي او سوداګرۍ برخو کې يې د دواړو هيوادونو د نيکو اړيکو ستاينه او د کار او ټولنيزو چارو وزير د غوښتنو اړوند يې د همکارۍ ژمنه وکړه.
د افغانستان لپاره د اوزبيکستان سفير همدارنګه ژمنه وکړه، چې د کار او ټولنيزو چارو وزارت يو تخنيکي ټيم لپاره به ياد هيواد ته د يو کاري سفر زمينه هم برابره کړي؛ څو د لا ښو دوه اړخيزه همکاريو په موخه د اوزبيکستان هيواد تخنيکي څانګو څخه ليدنه او له مسؤلينو سره يې له نږدې خبرې وکړي.
پای کې دواړو لوريو د دوه اړخيزه همکاريو او د دواړو لوريو ترمنځ د کاري چارو پروسې پر اسانتيا ټينګار و کړ.
