د کار او ټولنیزو چارو وزارت او جنوبی کوریا د نړیوالو مرستو دفتر تر منځ د لس میلیونه امریکایي ډالرو په ارزښت هوکړه لیک لاسلیک شو.
دغه هوکړه لیک چې موخه یې د افغان ـ کوریا د فني او حرفوي زده کړو انستیتوت ظرفیت او یو ملی مرکز ته لوړول دي، نن د کار او ټولنیزو چارو وزارت له خوا لاسلیک شو.
په همدې موخه جوړه شوې ناسته کې د کار او ټولنیزو چارو سرپرست سید انور سادات وویل، چې وړاندې تر دې ټول هوکړه لیکونه په وزارتونو او ادارو کې په مستقیم ډول لاسلیک کیدل، چې اوس د جمهوري ریاست عالی مقام د لارښوونې په اساس باید لومړی ټول هوکړه لیکونه د جمهوری ریاست عالی مقام او د عالی مقام د حقوقي مشاوریت تر تایید وروسته د دوو لوریو تر منځ لاسلیک کیږي، چې دغه هوکړه لیک هم د جمهوري ریاست عالي مقام حقوقي مشاوریت په تایید لاسلیک کیږي.
ښاغلي سادات زیاته کړه چې دغه دوه اړخیزه هوکړه لیک د سختو کرونایی حالاتو له کبله لومړی د جنوبی کوریا د نړیوالو مرستو دفتر مسؤلینو له خوا لاسلیک شوی دی، چې نن د کار او ټولنیزو چارو وزارت رهبرۍ له خوا د حقوقي پروسې د بشپړیدو او عملي کار پیل په موخه لاسلیک شو.
د کار او ټولنیزو چارو وزارت د سرپرست په وینا، د دې هوکړه لیک اصلي موخې، د ښوونکو روزلو مرکز جوړول، د اعتبار ور کولو سیستم را منځ ته کول، د کار او ټولنیزو چارو وزارت د فني او حرفوي زده کړو د ټولو ښوونکو ظرفیت لوړول، افغان ـ کوریا د کارموندنې څانګې د سیستم پراختیا، د ماستر ترینرانو روزل او د افغان ـ کوریا د ټولو ودانیو او وسائیلو بیا روغونه دی.
د ویلو دی، چې دغه هوکړه لیک به په پنځو راتلونکو کلونو ( ۲۰۲۰ ـ ۲۰۲۴ ) کې پلی شي.
