په هلمند کې ۸۲ تنه ځوانان له فني او حرفوي زدهکړو فارغ شول
د هلمند ولایت د کار او ټولنیزو چارو ریاست په هڅو؛ په مرکز لښکرګاه کې ۸۲ تنه ځوانان د تعمیراتو برېښنا، نلدوانۍ، د ودانیو رنګمالي او موبایل ترمیم په حرفو کې تر شپږ میاشتنیو نظري او عملي زدهکړو وروسته فارغ او ټولنې ته د ماهرو کارګرو په توګه وړاندې شول.
په همدې مناسبت جوړې شوې فراغت غونډې ته د هلمند ولایت د کار او ټولنیزو چارو رئیس الحاج مولوي رحیمالله مخلص په خپلو خبرو کې فارغ شویو ځوانانو ته په خطاب کې د مبارکۍ سربېره وویل: یوازې په ترلاسه شویو زدهکړو بسنه ونه کړئ؛ بلکې خپلې حرفوي او مسلکي وړتیاوې لا پراخې کړئ، ترڅو وکولی شئ خپلو هېوادوالو او ټولنې ته غوره خدمات وړاندې کړئ.
همداراز نوموړي زیاته کړه؛ هېواد لا هم د ماهرو کاسبانو له کمښت سره مخ دی او دا د ځوانانو ستر مسؤلیت دی چې دغه تشه ډکه کړي او نور باید د بهرنیو هېوادونو د کاري ځواک په تمه پاتې نه شو، بلکې په خپل هېواد کې د کار او کسب زمینه خپله برابره او د هېواد په رغونه کې فعاله ونډه واخلو.
