پکتیکا کې ٣٦٠ تنه له نشه یي توکو رغېدلي کسان د فني او حرفوي زدهکړو څخه فارغ شول
د پکتیکا ولایت د کار او ټولنیزو چارو ریاست اړوند د فني او حرفوي زدهکړو له مرکز څخه ٣٦٠ تنه زدهکوونکو د نجارۍ، خیاطۍ او د تعمیراتي برېښنا په رشتو کې تر شپږ میاشتینو زدهکړو وروسته نن د فراغت سندونه ترلاسه کړل.
په همدې مناسبت جوړه شوې غونډه کې چې د ولایت د مختلفو ادارو مسؤولینو، علمای کرامو او محلي خلکو حضور درلود، د پکتیکا مرستیال والي الحاج مولوي مخدوم عبدالسلام سعادت فارغ شویو زدهکوونکو ته د فراغت د مبارکۍ ترڅنګ زیاته کړه:
د خوښۍ ځای دی، چې د افغانستان اسلامي امارت؛ په بیا واکمنېدو سره د ټولنې تر ټولو دېر زیانمن شوي قشر د درملنې په موخه لاسونه بډ وهل او همدارنګه یې په وړیا توګه ورته د فني او حرفوي زدهکړو زمینه برابره کړه، ترڅو له فراغت وروسته خپلو کورنیو او هېوادوالو ته د اړوندو حرفو له لارې د خدمت جوګه شي.
د پکتیکا ولایت د کار او ټولنیزو چارو رئیس مولوي اسلام حسین الهام د خپلو خبرو په جریان کې وویل: د کار او ټولنیزو چارو وزارت تل په دې هڅه کې دی، چې د بېکاره، اړمنو او پر نشهیي توکو روږدو هېوادوالو مرسته او لاسنیوی وکړي، یاد موخې ته د رسېدو په لار کې یې د هېواد په کچه بېلا بېلې برنامې دایرې کړې، چې په تطبیق سره به یې د ډېری هېوادوالو ستونزو ته په وخت رسېدنه شوې وي.
د یادولو وړ ده، چې له فارغو شویو کسانو سره د کندهار کډوالو مؤسسې (KRO) په مالي ملاتړ د اړوندو حرفو د کار وسایلو سربېره؛ هر کس ته ٦٦٠٠ افغانۍ نقدي پیسې هم ورکړل شوې.
