د کار او ټولنيزو چارو وزارت او هاجر نړيوالې مؤسسې ترمنځ د دوه اړخيزه همکارۍ هوکړه ليک لاسليک شو
د کار او ټولنيزو چارو وزارت سرپرست وزير ملا عبدالولي څارنوال( حاجي وارث) د افغانستان لپاره د هاجر نړيوالې مؤسسې مرستيال روح الله احمدي سره د دوه اړخيزه اړيکو او ښې همغږۍ په موخه يو هوکړه ليک لاسليک کړ.
هغه ناسته چې په همدې موخه د کار او ټولنيزو چارو وزارت کې ترسره شوه په کې د وزارت مقام د دفتر رئيس مولوي شرف الدين شرف، د ماشومانو ساتنې رياست رئيس مولوي عبدالعزيز او د وزارت مقام د ټولنيزو چارو سلاکار رياض احمد محمد هم حضور درلود.
د دغه هوکړه ليک د لاسليکولو اصلي موخه د هاجر مؤسسې له لوري د کار او ټولنيزو چارو وزارت اړوند د کارته سه د زيانمن شويو ماشومانو مرکز ملاتړ دی، چې د هوکړه ليک او د ا.ا.ا د پاليسۍ سره سم به د هاجر مؤسسې له لوري د ياد مرکز د انجونو او هلکانو لپاره جلا جلا مناسبو ځايونو، د کارکوونکو مزد، خوراک، څښاک، جامې او روغتيايي خدمتونه برابر کړل شي.
د ياد هوکړه ليک د لاسليکولو پر مهال د کار او ټولنيزو چارو وزارت سرپرست وزير ملا عبدالولي څارنوال( حاجي وارث) د زيانمن شويو او له کورنيو څخه د ليرې پاتې شويو ماشومانو د خونديتوب او سالمې روزنې اړوند خبرې وکړې او دا يې د وزارت اړين مسؤليت ياد کړ و يې ويل چې هڅه کوي څو دا ډله او نورو د مختلفو کټګوريو ماشومان د کار او ټولنيزو چارو وزارت په خپلو امکاناتو او همدارنګه مرسته کوونکو مؤسسو په مالي همکارۍ ښه تربيه او و ساتي.
نوموړي په هيواد کې د ماشومانو وضعيت ته په اشاره په نورو ملي او نړيوالو مؤسسو هم غږ وکړ؛ څو د هاجر مؤسسې په څير د کار او ټولنيزو چارو وزارت سره د ماشومانو او نورو اړوندو برخو کې همکاري وکړي.
ملا عبدالولي څارنوال ( حاجي وارث) د هاجر مؤسسې مسؤلينو څخه و غوښتل؛ څو په مالي مصارفو او تدارکاتي پروسو کې ډير دقت او شفافيت څخه کار واخلي او ټول هغه مصارف چې د يادو مرکزونو لپاره کوي؛ بايد د کار او ټولنيزو چارو وزارت له لوري د معرفي شوي استازي په شتون کې ترسره کړي. نوموړي د هاجر مؤسسې له مسؤلينو وغوښتل؛ څو خپل ټول کارونه د هوکړه ليک پر بنسټ تنظيم او مخته يوسي.
د افغانستان لپاره د هاجر مؤسسې مرستيال روح الله احمدي د افغان ماشومانو لپاره د کار او ټولنيزو چارو وزارت مقام هڅو څخه مننه وکړه او ژمنه يې وکړه چې د کارته سه حمايوي مرکز( انجونو او هلکانو لپاره جلا مرکزونو) برخه کې به په ټول توان او د هوکړه ليک مطابق خپل ټول کارونه په ښه طريقه مخته يوسي.
