معلولیت لرونکو وګړو ته د ښو خدمتونو وړاندې کول؛ زموږ ټولو اخلاقي مسؤلیت دی.
دغه خبره د کار او ټولنیزو چارو وزیر بشیر احمد ته ینج، د شهیدانو او معلولینو په چارو کې د دولت وزیر لعل الدین آریوبې سره په لیدنه کې و کړه.
ناسته کې د شهیدانو او معلولینو په چارو کې د دولت وزیر لعل الدین آریوبې وویل چې د مختلفو ادارو له رهبرۍ سره د لیدونو موخه یې د ولسمشر د لارښوونو پر بنسټ د معلولیت ستراتیژۍ غني کول او عمل پلان ښه پلي کول دي.
نوموړي زیاته کړه چې هڅه کوو، څو معلولیت لرونکو وګړو ته د ښو خدمتونو وړاندې کولو موضوع د ټولو ادارو په اجنډا کې شامله او د هغوی ستونزو ته د هیواد په سطحه او ټولشموله توګه رسیده ګي و کړو.
لعل الدین آریوبي همدارنګه د فن او حرفې، روزنتونونو، کار او په ټوله کې د معلولیت لرونکو وګړو د ټولنیز خوندیتوب او خدمتونو رسولو برخه کې هم خبرې و کړې او په دې برخه کې یې د کار او ټولنیزو چارو وزارت د همکارۍ غوښتنه و کړه.
د کار او ټولنیزو چارو وزیر بشیر احمد ته ینج، د شهیدانو او معلولینو په چارو کې د دولت وزیر او کاري ټیم ته د ښه راغلاست ترڅنګ د معلولیت ستراتیژۍ جوړیدو او نور اړینو خدمتونو برخه کې د یاد وزارت له هڅو مننه و کړه و یې ویل: معلولیت لرونکو وګړو ته د ښو خدمتونو رسول نه تنها چې زموږ ټولو مکلفیت دی، بلکې د ټولنې دې قشر ته د ښو خدمتونو رسول او ستونزو ته یې رسیده ګي زموږ ټولو یو اخلاقي مسؤلیت هم دی.
نوموړي زیاته کړه: موږ ځان مکلف بولو؛ څو د شهیدانو او معلولینو په چارو کې د دولت وزارت سره په ښه همغږۍ، هغه موارد چې د کار او ټولنیزو چارو وزارت اړوندیږي، کار او همکاري و کړو.
د کار او ټولنیزو چارو وزیر وویل: د معلولیت ستراتیژۍ لا غنامندۍ برخه کې به زموږ نظرونه ستونزې جوړوونکي نه بلکې ملاتړ کوونکي اوسي او د کار او ټولنیزو چارو وزارت اړوند ټول هغه موارد چې د یادې ستراتیژۍ لا غني کیدو کې ګټور تمامیږي، د همکارانو له خوا به له یاد وزارت سره په رسمي ډول شریک کړل شي.
د ویلو دی، چې د کار او ټولنیزو چارو وزارت ۱۴۰۰ مالي کال کې د ټولنیزو چارو معینیت تر چتر لاندې د معلولیت لرونکو وګړو او ماشومانو ته لس میلیونه افغانۍ ځانګړې کړې دي.
