د کار ملي پاليسي په پرنسيب کې تائيد شوه.
په همدې موخه جوړه شوې غونډه کې چې د کاري چارو مرستيال سيد عبدالکريم هاشمي، د کارګرانو اتحاديې ( امکا) مشر معروف قادري د معادن او صنايع خونې مشر رحيم الله سمندر او د وزارت يو شمير رئيسانو په کې ګډون کړی وه، په ترڅ کې يې د کار ملي پاليسي، چې د کارموندنې او کډوالۍ ملي استراتيژي هم په کې شامليږي، وروسته تر بحث او د ټولنيزو شريکانو له نظرياتو په پرنسيب کې تائيد شوه.
په دې ناسته کې د کاري چارو مرستيال سيدعبدالکريم هاشمي وويل، چې مخکې مو داسې منظمه او هر اړخيزه ستراتيژي نه درلوده، چې له نيکمرغه د ټولنيزو شريکانو، نړيوالې ټولنې او ماليې وزارت په همکارۍ او د کار او ټولنيزو چارو وزارت د پاليسۍ او پلان عمومي رياست په هڅو د دې پاليسۍ مسوده ترتيب شوه، چې موخه يې د کاري فرصتونو رامنځ ته کول، د کارګرانو د رفا تضمين، په کارونو کې د مؤثريت زياتوالی او د کارګرانو لپاره د ښه کاري محيط را منځ ته کول دي. ښاغلي هاشمي زياته کړه، چې د کار او ټولنيزو چارو وزارت د کار ملي پاليسۍ د ترتيبولو مسؤليت په غاړه لري، څو د بيکارۍ له منځه وړلو لپاره لازمې حل لارې چارې و لټوي، چې له نيکمرغه د کار ملي پاليسي کې هم د کار اړوند مهم موضوعات لکه د کارګر او کارفرما تر منځ اړيکو، د مسلکي او کار رامنځ ته کوونکو د مناسباتو، حد اقل مزد، په هيواد کې د کار کيفيت او کميت ته پاملرنې، د کار بازار مطابق د فني او حرفوي زده کړو د نصاب بيا کتنې، بهر ته د کارګرانو ليږلو او په ټوله کې د خصوصي سکتور سره په ښه همغږۍ هيوادوالو ته په کور دننه د کار موندنې مهم موضوعات راغلي دي.
وروسته د پاليسۍ او پلان عمومي سرپريت چاري قل اديب د کار ملي پاليسۍ د موخو اړوند يو جامع او هر اړخيز پريزنتيشن وړاندې کړ، چې په پايله کې د کار او ټولنيزو چارو وزارت د ټولنيزو شريکانو د نظرونو تر اوريدلو دغه پاليسي په پرنسيب کې تائيد شوه.
