د کار او ټولنیزو چارو وزارت کې د معلوماتي سیستمونو پرانست غونډه
دغه سیستمونونه چې د معلوماتي تکنالوژۍ ریاست په هڅو جوړ شوي وو، د یو لړ مراسمو په ترڅ کې د کار او ټولنیزو چارو وزارت سرپرست له خوا پرانستل شول.
په همدې موخه جوړو شویو مراسمو کې د کار او ټولنیزو چارو سرپرست سید انور سادات، مالي او اداري چارو مرستیال مسعود الله اوریاخیل، د مخابراتو او معلوماتي تکنالوژۍ وزارت د ښې حکومتوالۍ برخې مشر داکتر مجیب مهمند، د وزارت یو شمیر رئيسانو او آمرین برخه اخیستې وه.
د کار او ټولنیزو چارو وزارت سرپرست سید انور سادات د خپلو خبرو په ترڅ کې د دې سیستمونو پرانسته د اداري فساد په را کمولو، په کارونو کې د شفافیت او کارونو د سرعت لپاره مهم و بلل او زیاته یې کړه، چې ملي وحدت حکومت تل الکترونیکي حکومتوالۍ باندې ټینګار کړی دی، چې د کار او ټولنیزو چارو وزارت تر دې مهاله د الکترونیکي حکومتوالۍ برخه کې تر ډیره بریده کار کړی دی.
ښاغلي سادات وویل: د کار او ټولنیزو چارو وزارت مخکې تر دې هم خپلې ځینې پروسې الکترونیکي کړي دي، چې له دې ډلې د حاضرۍ الکترونیکي کول، د کارمندان د معاشونو ور کول د ام پيسه له لارې، همدارنګه د یو منظم الکترونیکي سیستم له لارې د هویت کارت جوړول، د معلوماتي مرکز جوړیدل، د داخلي او بهرنیو کار جوازونو الکترونیکی سیستم جوړیدل او د وزارت موټرو کې د GPS لګول د یادونې وړ دي او اوس هم له نیکمرغه د کار او ټولنیزو چارو وزارت د معلوماتي ټکنالوژۍ ریاست په هڅو د اداري مراسلاتو انلاین تعقیبول او د تدارکاتي پروژو څخه د انلاین نظارت سیستمونه پرانیزو، چې د وزارت د الکترونیکي حکومتوالۍ په تطبیق کې یو لوی ګام شمیرل کیږي.
وروسته د معلوماتي تکنالوژۍ او مخابراتو وزارت د الکترونیکي حکومتوالۍ برخې مشر داکتر مجیب مهمند هم د الکترونیکي حکومتوالۍ پر ګټو خبرې و کړې او په دې برخه کې یې د کار او ټولنیزو چارو وزارت له هڅو څخه ستاینه و کړه.
د کار او ټولنیزو چارو وزارت د معلوماتي ټکنالوژۍ ریاست مشر آقامحمد حیدري د یادو سیستمونو څخه د کار اخیستلو په اړه تفصیلي پریزنتیشن وړاندې کړ، نوموړي وویل، چې اوس مهال د جنسي محاسبې مدیریت پر انلاین سیستم، د وزارت د آرشیف او املاکو د ثبت لپاره د سیستمونو پر جوړیدو کار روان دی، چې په نږدې راتلونکي کې به جوړ او پرانستل شي.
په پای کې هم یاد سیستمونه د کار او ټولنیزو چارو وزارت رهبرۍ له خوا د پټۍ په پریکولو سره رسما پرانستل شول.
