د کار انسټیټیوټ کې د ظرفیتلوړونې د برنامو لړۍ روانه ده
د کار او ټولنیزو چارو وزارت انسټیټیوټ په هڅو د امارتي ادارو د کارکوونکو لپاره د نوښتګرو مدیرانو د روزنې په منظور د مدیریت بدلون تر عنوان لاندې پنځه ورځینی سیمینار جوړ شو.
د سیمینار په پرانیست غونډه کې د کار انسټیټیوټ رئیس شریفالله شرافت، په یوه اداره کې د بدلون اړتیا پېژندل، له نویو پرمختګونو سره ځان عیارول، د اغېزمنو اړیکو جوړول او کارکوونکو ته د بدلون د موخو، لارو او ګټو واضح کولو په اړه هر اړخیز معلومات شریک او له ګډونوالو یې وغوښتل، چې په دې پروګرام کې له ترلاسه شویو زدهکړو، مهارتونو او تجربو څخه په استفادې هېوادوالو ته غوره او ګټور خدمات وړاندې کړي. نوموړي همداراز ډاډ څرګند کړ، چې د وخت اړتیاوو ته په کتو سره به په خپلو روزنیزو پروګرامونو او برنامو کې پراخوالی راولي.
د یادونې وړ ده، چې د کار انسټیټیوټ په هڅو، په کاپیسا ولایت کې هم د فني او حرفوي زدهکړو د استادانو لپاره د مېتودولوژي او د فني او حرفوي زدهکړو د نصابونو د تطبیق تر عنوانونو لاندې دوه برنامې په عملي ډول پيل شوې دي.
