سپین بولدک او تورخم ښارګوټي کې بېرته راستنېدونکو کډوالو ته د خدماتو لړۍ روانه ده

د افغانستان اسلامي امارت له لوري بېرته راستنېدونکو کډوالو ته د خدماتو د تنظیم کميټې سره په هم‌غږۍ او د کار او ټولنیزو چارو سرپرست وزیر الحاج ملاعبدالمنان عمري د هدایت سره سم، د کندهار ولایت سپین‌بولدک او د ننګرهار ولایت تورخم ښارګوټي کې د دې وزارت مېشتو تخنیکي ټیمونو پرون سه‌شنبه۴۱۵تنه بېرته راستنېدونکي هېوادوال سیستم کې ثبت او مختلفو برخو کې یې هغوی ته خدمات وړاندې کړل.
د کار او ټولنیزو چارو وزارت تخنیکي ټیمونه توانیدلي چې تېره ورځ د ننګرهار ولایت تورخم ښارګوټي کې ۱۰۰تنه او د کندهار ولایت سپین‌بولدک ولسوالۍ کې ۳۱۵تنه بېرته راستنېدونکي کډوال سیستم کې ثبت کړي، او هم د روغتیايي خدماتو، د ترانسپورت د تنظیم او د زیانمنو اقشارو څخه د ملاتړ په برخو کې د هغوی لاسنیوی وکړي. 
سیستم کې د بېرته راستنېدونکو کډوالو د ثبت موخه دهغوی د تعلیم او تحصیل د سویې معلومول او فني او حرفوي زد‌ه‌کړو ته یې لاسرسی دی چې له دې لارې به په راتلونکي کې د کاري فرصتونو په برابرولو کې آسانتیاوې رامنځته شي.
 هېره دې نه وي چې یاد سیستم کې سایبري خوندیتوب پیاوړی شوی‌دی ترڅو د انټرنټي غلو د احتمالي بریدونو څخه هم خوندي پاتې شي.