بهر ته د کارګرانو لیږلو او کور دننه کارموندنې پروژې ټولنیز مسائيل او چاپیریال ساتنې مدیریت چارجوب تائيد شو.

بهر ته د کارګرانو لیږلو او کور دننه کارموندنې پروژې اړوند ټولنیزو مسائيلو او چاپيریال ساتنې مدیریت سند د دې پروژې له شریکانو سره په دوهمه مشورتي ناسته چې د کار او ټولنیزو چارو وزارت کې د سرپرست وزیر سید انور سادات په مشرۍ جوړه شوې وه، د ګډونوالو او شریکانو له خوا په پرنسیپ کې تائيد شو.

په غونډه کې د کار او ټولنیزو چارو سرپرست سید انور سادات، بهر ته د کارګرانو لیږلو او کور دننه کارموندنې پروژې  (PLACED)اړوند خبرې و کړې و یې ویل: اوس مهال افغانستان له مختلفو امنیتي، اقتصادي او ټولنیزو ستونزو سره مخامخ دی، خو بیوزلي او بې کارۍ د هیواد پر ټولنیزو ستونزو زیات تاثیر اچولی دی، خو دغه پروژه به د بې وزلۍ او بې کارۍ په له منځه وړلو کې ګټوره تمامه شي.  

سید انور سادات زیاته کړه، چې بهر ته د کارګرانو لیږلو او کور دننه کارموندنې پروژه  (PLACED)د نړیوال بانک له خوا تمویلیږي او د دې نهاد لومړنۍ تجربه ده، چې وروسته له منظورۍ دې پروژې ته پنځوس میلیونه ډالره ځانګړي کوي.  

په غونډه کې د یادې پروژې تخنیکي برخې مسؤل هارون شیرزي د پروژې اړوند معلومات وړاندې کړل او د ګډونوالو د پوښتنو په ځواب کې د پروژې د سرپرست او نورو مسؤلینو له خوا لازم توضیحات وړاندې شول.  

همدارنګه په ناسته کې د یادې پروژې د موخو، د سند جوړولو لارو، د پلي کوونکو ادارو مسؤلیتونو علاوه د خطر کمولو برنامې، د ټولنیزو او چاپيریال ساتنې عمده خطرونو او تاثیرونو، د ښاریانو د مشارکت، شکایتونو ته د رسیدو، د پروژې پر نظارت او خلکو سره د عامه معلوماتو شریکولو او مشورو اړوند هم هر اړخیزې خبرې و شوې.

د ویلو دی، چې د دې سند په نهایي کېدو سره به متحده عربي اماراتو ته د  کارګرانو لیږلو او کور دننه کارموندنې پروژه په عملي توګه پيل شي.