د کار او ټولنيزو چارو وزارت د ستراتيژيک پلان مسودې بيا کتنه

د کار او ټولنيزو چارو وزارت د ستراتيژيک پلان د مسودې کتنې او غني کولو اړوند ناسته د وزارت د غونډو تالار کې و شوه، چې په کې د دې وزارت د برنامو جوړولو او پلانونو طرحې رياست تخنيکي کارکوونکو او يو شمير بهرنيو سلاکارانو هم برخه اخيستې وه. 
د ناستې پيل کې د کار او ټولنيزو چارو وزارت د پلان د طرحو او برنامو جوړولو رياست آمر ميرويس نيازي د ستراتيژيک پلان د مسودې اړوند معلومات وړاندې کړل او ياد سند يې د وزارت د راتلونکو پنځه کلونو سترتيژيکو موخو لپاره مهم ياد کړ. 
وروسته د مسودې اړوند د وزارت د (MRSD) پروګرام مسؤل داکتر ستيفن خبرې و کړې و يې ويل: اوسنی ستراتيژيک پلان د وزارت يو معتبره سند دی چې ياد وزارت به د اصلاحاتو، ظرفيت لوړولو او نويو سيستمونو جوړولو برخه کې ګټور تمام شي؛ ښاغلي ستيفن زياته کړه چې د کار او ټولنيزو چارو وزارت د ستراتيژيک پلان مسودې په بشپړيدو او ظرفيت لوړيدو سره به مرسته کوونکي هېوادونه دې وزارت ته لا زياته او ځانګړې پاملرنه وکړي. 
په ناسته کې د وزارت د پلانونو د طرحې او برنامو جوړولو رياست کارکوونکو نورالدين جليلي او تړون يوسفي د وزارت د نوي ستراتيژيک پلان د جوړښت او نهايي کولو پر ميکانيزم معلومات وړاندې کړل او همدارنګه يې د کار بازار مديريت اړوند د جوړې شوې مسودې په هکله هم ګډون کوونکو سره معلومات شريک کړل. 
ناسته کې ټولو ګډونوالو د ستراتيژيک پلان مسودې غني کولو او څيړلو اړوند هم خپل نظرونه شريک کړل. 
د ويلو دی چې  (GIZ) دفتر د اروپايي ټولنې په مالي ملاتړ د کار او ټولنيزو چارو وزارت کې د ظرفيت لوړولو پروګرامونو او سيستم جوړولو ترڅنګ د ستراتيژيک پلان نهايي کولو برخه کې هم بهرني سلاکاران ګمارلي، چې د يادو سلاکارانو په همکارۍ به د وزارت د راتلونکو پنځه کلونو لپاره ستراتيژيک پلان ترتيب او نهايي شي.