کابل کې ۹۰ تنه ځوانان له فني او حرفوي زده کړو فارغ شول
د کار او ټولنیزو چارو وزارت؛ اړوند د مهارتونو د پراختيا لوی ریاست په هڅو او همغږۍ ۹۰ تنه ځوانان؛ له زیان سره مخ اقشارو د فني او حرفوي زدهکړو له مرکز فارغ او تصديقپاڼې ترلاسه کړې .
په همدې مناسبت جوړې شوې فراغت غونډې ته د کار او ټولنیزو چارو وزارت د کار چارو معین الحاج مولوي محمدزاهد احمدزي په خپلو خبرو کې فارغشویو ځوانانو ته د مبارکۍ سربېره وویل: د خوښۍ ځای دی، چې نن له زیان سره مخ اقشارو د فني او حرفوي زده کړو له مرکزه ۹۰ تنو ځوانانو د فراغت شاهدان یو، چې په نلدوانۍ، د تعمیراتو برېښنا او د موبایل ترمیم حرفو کې تر شپږ میاشتنیو نظري او عملي زده کړو وروسته ټولنې ته د ماهرو کاریګرو په توګه وړاندې کیږي، چې په دې سره به دوی وکولي شي خپلې کورنیو ته حلاله نفقه پیداکړي.
د کار چارو معین همدا راز څرگنده کړه، چې دا وزارت د خپلو نورو مسؤلیتونو ترڅنګ، د هېواد په ټولو ولایتونو کې ځوانانو، له اعتیاد څخه رغېدلو کسانو او معلولو مجاهدینو ته په مختلفو برخو کې د کار بازار اړتياوو ته په کتو د فني او حرفوي زدهکړو زمینه برابره کړې او هر کال په زرګونو تنه ځوانان له دې حرفو څخه د فراغت سندونه ترلاسه کوي. زموږ تجربو ښودلې ده، چې د دغو فارغانو ډېری برخه اوس د کار بازار کې عملاً بوخت او له دې لارې د خپلو کورنیو نفقه برابروي، چې بېسارې او مهم اقدام دی او تر یوه بریده یې د بېکارۍ د کچې په راکمولو کې مثبته اغېزه کړې ده.
مولوي احمدزي د خپلو خبرو په دوام کې زیاته کړه، چې بېکاري زموږ د ولسونو یوه ستونزه ده او د هغې پر وړاندې د مبارزې په موخه، ا.ا.ا، په ځانګړي ډول د کار او ټولنیزو چارو وزارت، هڅه کوي چې هېوادوالو ته د کار مناسب فرصتونه برابر کړي.
په پای کې د کار چارو معین؛ د مهارتونو د پراختیا لوی رئیس مولوي رحیمالله صراح، د فني او حرفوي زدهکړو د تنظیم رئیس مولوي عبدالواحد فایز؛ د افغان جایکا رهبري پلاوي او خبریالانو سره څنګ پرڅنګ د زیانمنو اقشارو د فني او حرفوي زدهکړو له مرکز څخه لېدنه وکړه او د یاد مرکز له ټولګیو، زدهکوونکو، استادانو او مسئولینو سره یې وکتل، زدهکوونکو ته یې د هر ډول همکاریو ډاډ ورکړ، د استادانو او مسئولینو له هڅو یې مننه وکړه او هغوی ته یې په چارو کې د بریالیتوب هېله څرګنده کړه.
