د کار چارو معین د صنعتکارانو ټولنې له مشر سره وکتل؛
د کار او ټولنیزو چارو وزارت د کار چارو معین مولوي محمد زاهد احمدزي د خپل کار په دفتر کې د افغانستان د صنعتکارانو ټولنې له مشر عبدالجبار ساپي او ورسره مل پلاوي سره وکتل.
په پیل کې ښاغلي عبدالجبار ساپي په هېواد کې د بېکارۍ کچې ټیټولو، د اړمنو او بېوزله هېوادوالو لاسنیوي او له نشهیي توکو څخه رغېدلو کسانو ته د کار بازار د اړتیاوو مطابق د فني او حرفوي زدهکړو د زمینې د برابرولو په برخو کې د کار او ټولنیزو چارو وزارت هڅې او فعالیتونه وستایل.
عبدالجبار ساپي همدارنګه، په هېواد کې د صنعتکارانو د عمده فعالیتونو، لاسته راوړنو او د دوی په وړاندې د شته ستونزو په اړه معلومات شریک او د دې وزارت له مشرتابه څخه یې غوښتنه وکړه، چې د کارکوونکو د ظرفیت لوړونې په موخه لنډه مهاله او اوږد مهاله نظري او عملي پروګرامونه برابر کړي.
ورپسې د کار چارو معین مولوي محمد زاهد احمدزي مېلمنو ته د ښه راغلاست ترڅنګ؛ هېواد کې د خصوصي سکتور ونډه وستایله او څرګنده یې کړه، چې د افغانستان اسلامي امارت ژمن دی ترڅو له دې برخې څخه قوي ملاتړ وکړي.
په همدې ترتیب یې کورنیو او بهرنیو وګړو ته د کار جوازونو د وېش څخه یادونه وکړه او هیله یې وښوده چې خصوصي سکتور دې برخې ته پاملرنه وکړي.
