د کار ملي کانفرانس د ژمنو د تعقیب په موخه د لوړو زدهکړو وزارت سره د همغږۍ ناسته وشوه
د کار او ټولنیزو چارو وزارت د کار چارو معین الحاج مولوي محمد زاهد احمدزي، د لوړو زدهکړو له وزیر شیخ ندا محمد ندیم سره د کار ملي کانفرانس د ژمنو د تعقیب او د ځینو نورو مواردو په اړه وکتل.
د کار چارو معین د لوړو زدهکړو وزارت له لوري د کار ملي کانفرانس د ژمنو د عملي کېدو په برخه کې د ترسره شویو فعالیتونو څخه د مننې ترڅنګ، هیله وښوده چې د کار او ټولنیزو چارو وزارت یو شمېر په شرایطو برابرو کارکوونکو ته دې د فوق لسانس زدهکړو زمینه برابره شي. په همدې توګه یې څرګنده کړه: د کار او ټولنیزو چارو وزارت له لوري د پوهنتونونو ګڼ شمېر فارغانو ته د ادارې، مدیریت، معلوماتي ټکنالوجۍ او ځینو نورو برخو کې د عملي کار زمینه برابره شوې، یو شمېر ځوانان له دې برنامو فارغ او ځیني نور اوسمهال ورته زدهکړې ترلاسه کوي او ژمن یو، چې دې لړۍ ته ادامه ورکړو، ترڅو ځوانان وکولی شي کاري تجربه ترلاسه او په راتلونکي کې د دندو په پيداکولو کې ورته لازم سهولت برابر شي.
ورپسې د لوړو زدهکړو وزیر په خپلو خبرو کې د دې ترڅنګ، چې د دې وزارت هڅې او فعالیتونه وستایل په یادو برخو کې یې د همکارۍ ډاډ څرګند او هیله یې وښوده، چې ټولې امارتي ادارې هېوادوالو ته د غوره خدماتو د وړاندې کولو په لارو کې ترپخوا لا ډېرې هڅې او کوښښونه وکړي.
