د کار او ټولنیزو چارو سرپرست وزیر د کابل ولایت د مختلفو اقشارو له استازو سره وکتل
د کار او ټولنیزو چارو سرپرست وزیر الحاج ملاعبدالمنان عمري نن د کابل ولایت د ۲۲ ګونو ناحیو او ۱۴ ولسوالیو علمای کرامو، متنفذینو او د ځوانانو له استازو سره د خپل کار په دفتر کې وکتل.
په پیل کې د کار او ټولنیزو چارو سرپرست وزیر الحاج ملا عبدالمنان عمري راغلو مېلمنو ته د ښهراغلاست ترڅنګ وویل: د ناستې اصلي موخه، یو د بل پیژندل او شته ستونزو او ننګونو ته په ګډه توګه د حللارو لټول دي، ځکه د ولس له همکاریو پرته مسؤلین نهشي کولای ټولې ستونزې حل کړي، ولس باید د ټولنې ستونزې د مربوطه ادارو مخې ته کیږدې او مسؤلین هم خپل محدودیتونه له ولس سره شریک کړي، ترڅو متقابل تفاهم رامنځته شي.
الحاج ملاعبدالمنان عمري زیاته کړه: د ولس زړونه هغه وخت لاستهراوړلی شو، چې د هغوی ستونزې تشخیص او ورته په دقیقه او هراړخیزه توګه د حللارې پیدا کړو؛ ځکه د دوی ستونزو له حل پرته د ولس ملاتړ ترلاسه کول ناممکن ده، یوازې د ستونزو په حل سره یې کولای شو چې د ولس د مایوسی مخنیوی وکړو.
د کار او ټولنیزو چارو سرپرست وزیر وویل: بهرنیو هېوادونو ته تګ د حل لاره نه ده؛ ځکه د هر هېوادوال عزت یوازې په خپل هېواد کې خوندي دی، موږ هڅه کوو، چې بهرته په قانوني او عزتمن ډول د افغان ځوانانو د لېږد زمېنه برابره کړو.
په همدې توګه غونډې ته د قرهباغ ولسوالۍ قومي مشر مولوي فاضل فضلي وویل: د اوبو د مدیریت او مهار په څیر د لویو پروژو په پلي کیدو سره کولای شو؛ چې د بېکاری ستونزه تر ډیره بریده راښکته کړو.
د کابل ولایت د ۱۳مې ناحیې استازي محمداسحق صفدري، افغاني ټولنه یوه زراعتي ټولنه وبلله او د زراعت سکتور ته لومړیتوب یې د بېکاری ستونزې په کمښت کې اغیزناک یاد کړ.
ورته مهال د ۲۲ ناحیو د وکیلانو د شورا عمومي رئیس احمدشاهالکوزي هم غونډې ته وویل: د کار او فني او حرفوي زدهکړو پراختیا او بهر ته د افغان کارګرانو قانوني لېږد د بېکاری کچه راټیټولی شي.
په پای کې د کابل ولایت د نورو پاتې ناحیو او ولسوالیو استازو؛ بېکاري؛ د هېواد له لویو ستونزو وګڼله او په هېواد کې د زراعت میکانیزه کول، زراعتي او صنعتي بانکونو جوړول، د بيکاری عواملو او کاري فرصتونو پنځولو لپاره د علمي سیمینارونو دایرول، د زراعتي محصولاتو کښت، پروسس او تجارت ته بهتره زمینه برابرول، ولسوالیو ته د فني او حرفوي زدهکړو د بهیر غځول، صنعتکارانو او پانګهاچوونکو ته د اسانتیاوو برابرول یې په هېواد کې د بېکاری کچې په کمښت کې اړین وبلل.
