د کار او ټولنیزو چارو سرپرست وزیر خپل ایراني سیال سره وکتل
د کار او ټولنیزو چارو سرپرست وزیر سید انور سادات، ایران ته په خپل دوه ورځني سفر کې له خپل ایراني سیال د ایران د کار، تعاون او ټولنیزې هوساینې وزیر ښاغلی محمد شریعتمداری سره ولیدل.
په دغه لیدنه کې چې د تخنیکي او مسلکي تعلیماتو ادارې رییسې ندیمې سحر هم ګډون درلود، په ایران کې د افغان کارګرانو فعالیت قانوني کیدل تر ټولو مهم وګڼل او د هغوی د هویت په تثبیت او د رسمي کار جواز په صدور ټینګار و شو، بهر ته د افغان کارګرانو د لیږلو او استخدام مسوده ایراني لورې سره شریکه شوه او پر دې پریکړه وشوه، چې دا طرحه په تخنیکي کمیټه کې تر بحث لاندې ونیول شي چې په پایله کې یاده تخنیکي کمیټه جوړه او لمړنۍ ناسته یې د ایران په پلازمینه تهران کې ترسره کړه.
د ایران د کار، تعاون او ټولنیزې هوساینې وزیر ښاغلی محمد شریعتمداری ټینګار وکړ، چې د کارګرانو تنظیم او استخدام تړون باید د ستراتیژیکو همکاریو هراړخیز سند سره هم مهاله نهایي او لاسلیک شي. په همدې اساس بهر ته د کارګرانو لیږد او استخدام طرحه د ستراتیژیکو همکاریو هراړخیز سند په نهایي کیدو پورې وتړل شو.
د ایران اسلامي جمهوریت د تعاون، کار او ټولنیزې هوساینې وزیر ټینګار وکړ، چې ایران میشته افغانان نه یوازې کارګر بلکې کارګمارونکي هم دي، چې د دیرش زرو په شاو خوا کې افغان کارګمارونکو د فعالیت جوازونه ترلاسه کړي دي، هغوی ډیر شمیر فعال او مهم تجارتي شرکتونه لري چې شپیته سلنه یې په صنایعو او څلویښت سلنه یې په خدماتي فعالیتونو بوخت دي، اته سوه زره افغان کارګر په غیرمجاز ډول فعالیت کوي او د ایران دولت دوه سوه زرو افغان کارګرانو ته د کار جواز صادر کړی دی.
همدا راز د کار او ټولنیزو چارو سرپرست وزیر په تهران کې د امام خمیني بنسټ د مرستو کمیټې له رئیس سره د همدې بنسټ په مرکزي دفتر کې وکتل.
د کار او ټولنیزو چارو سرپرست وزیر د امام خمیني بنسټ د فني او حرفوي تعلمیاتو په ډګر کې د افغانستان له کار او ټولنیزو چارو وزارت سره له تلپاتو همکاریو مننه وکړه.
د ویلو ده چې د امام خمیني مرستو بنسټ د کار او ټولنیزو چارو وزارت په چوکاټ کې د افغانستان په شپږو ولایاتو کې د فني او حرفوي زده کړو مرکزونه تمویل او تجهیز کړې دي او کار روزونکو ته روزنه ورکوي، چي په کلني ډول هر کال شپږ زره تنه نارینه او ښځینه په یادو مرکزونو کې روزنه ترلاسه کوي.
