د کار او ټولنيزو چارو وزارت او مرسي کور مؤسسې تر منځ هوکړه ليک لاسليک شو.
دغه هوکړه ليک نن د کار او ټولنيزو چارو وزارت سرپرست ملا عبدالولي څارنوال( حاجي وارث) او مرسي کور مؤسسې مشر ښاغلي جک تر منځ لاسليک شو.
د ياد هوکړه ليک پر بنسټ به د مرسي کور دفتر له لوري هرات او کندهار ولايتونو کې ۱۶۰۰ تنه داخلي بې ځايه شويو ځوانانو ته د فني او حرفوي زده کړو زمينه برابره شي.
د هوکړه ليک د لاسليک کولو پر مهال د کار او ټولنيزو چارو وزارت سرپرست ملا عبدالولي څارنوال( حاجي وارث) فني او حرفوي زده کړې د بيکارۍ له منځه وړلو او کار موندنې برخو کې مهمې و بللې او د مرسي کور دفتر له مسؤلينو يې و غوښتل؛ څو خپل ټول کارونه د هوکړه ليک پر بنسټ پلي او وخت په وخت وزارت سره خپل کاري راپور شريک کړي.
د مرسي کور دفتر مشر ښاغلي جک د خپلو خبرو په ترڅ کې د کار او ټولنيزو چارو وزارت سرپرست او همکارانو څخه يې د مننې ترڅنګ ژمنه وکړه، چې د يادې پروژې ټول کارونه به د کار او ټولنيزو چارو وزارت رهبرۍ او مسؤلينو په لارښوونه او ښه همغږي مخته يوسي.
د ويلو دی، چې د ياد هوکړه ليک له مخې به د مرسي کور مؤسسې له لوري د کندهار او هرات ولايتونو ۲۶ مرکزونو کې په شرايطو برابر کسانو ته ۲۲ مسلکي څانګو کې د فني او حرفوي زده کړو زمينه برابره شي.
