د ټولنيزو چارو مرستيال د یونیسف ادارې له سرپرستې سره و کتل.
د کار او ټولنيزو چارو وزارت د ټولنيزو چارو مرستيال غلام حيدر جيلاني په خپل کاري دفتر کې د يونيسف ادارې له سرپرستې آغلې شيما سين ګوپتا ( Sheema Sin Gupta) سره و کتل.
په ياده ليدنه کې دواړو لوریو د ټولنیز خوندیتوب او ساتنې پر څو کلن پلان، د ټولنيز خونديتوب پالیسۍ او همدارنګه د ماشومانو د ساتنې ملي پاليسۍ په تصويب او د هغې په تطبيقي پلان هر اړخيز بحث وکړ.
د ټولنيزو چارو مرستيال وزير غلام حيدر جيلاني په خپلو خبرو کې په هيواد کې د يونيسف ادارې له فعاليتونو او همکاريو مننه وکړه او د ماشومانو د خونديتوب او ساتنې په برخه کې د يادې ادارې فعاليتونه يې مهم وبلل.
هغه همدارنګه د ټولنيز خونديتوب ملي پاليسۍ په ترتيب او د يادې مؤسسې له تخنيکي مرستو ستاينه او مننه وکړه. ښاغلي جيلاني زياته کړه، چې ياده پاليسي د جمهور رئيس د مرستيال په مشرۍ په عالي جلسه کې د اړونده برخو له نظرياتو اخيستلو وروسته د تصويب په موخه طی مراحل کړي.
د افغانستان لپاره د يونيسف ادارې سرپرستې آغلې ګوپتا د ټولنيز خونديتوب ملي پاليسۍ او د تطبيقي پلان په اړه معلومات وړاندې کړل او پريکړه وشوه چې په راتلونکو څو ورځو کې به د دواړو لوریو تخنيکي کميټو ترمنځ ناسته وشي او په پالیسۍ کې د مناسبو بدلونونو او تغييراتو په اړه به له نږدې خبرې او کار وکړي.
