د امنيتي، دفاعي، ملکي او زندانونو په چارو کې د دولت وزارت د همغږۍ رئیس سره د ټولنيزو چارو مرستيال وزير ليدنه.
د کار او ټولنيزو چارو وزارت د ټولنيزو چارو مرستيال وزير ښاغلي غلام حيدر جيلاني د افغانستان اسلامي جمهوريت د سولې په چارو کې د دولت وزارت د امنيتي، دفاعي، ملکي او زندانونو په چارو کې د همغږۍ رئیس ښاغلي ډاکټر ميرويس څرګند سره د سولې په بهیر او د سولې بهير له برياليتوب وروسته د داعشي ماشومانو د ذهنیت جوړولو، ملکي ژوند ته د هغوی را ګرځيدو او همدارنګه خپلو کورنيو سره د یادو ماشومانو بیرته يو ځای کيدو په اړه خبرې وکړي.
په ناسته کې د ټولنيزو چارو مرستيال وزير وويل: د کار او ټولنيزو چارو وزارت د بودجې کموالي او د مناسب ځای نشتوالي له امله نه شي کولای چې داعشي ماشومان په خپلو روزنتونونو کې ځای پر ځای کړي، څرنګه چې روزنتون د بیوزلو، ذهني تأخر سره مخ، متضرره، زيانمنونکو او واټونو باندې کارګر ماشومانو ځای دی؛ له همدې امله نشو کولای چې ګڼ شمېر داعشي ماشومان د امنيتي دلايلو له مخې هلته تر روزنې او پالنې لاندې ونيسو.
وروسته د امنيتي، دفاعي، ملکي او زندانونو په چارو کې د همغږۍ رئیس ښاغلي ډاکټر ميرويس څرګند په خپلو خبرو کې وویل: د سولې راوستلو او په ځانګړي ډول د سولې بهير له برياليتوب وروسته د سولې ساتلو لپاره اړتيا ده چې دا ډول وسلوالو جګړو ځپلې ماشومانو ملاتړ وکړو.
په پای کې دواړو لوریو هوکړه وکړه چې د يادو ماشومانو غوره ساتلو او ملاتړ په ډګر کې به خپلو همکاریو ته دوام ورکوي.
