بهر ته د کارګرانو ليږلو ګډې کاري کمېټې غونډه جوړه شوه.
دغه غونډه د کار او ټولنيزو چارو وزارت په رهبرۍ د نورو همکارو ادارو استازو په ګډون جوړه شوې وه، چې په کې د کډوالۍ ملي ستراتيژۍ د تطبيق اړوند هر اخيز بحثونه و شول.
په ناسته کې د کاري چارو مرستيال سيد عبدالکريم هاشمي د خبرو په ترڅ کې د مهاجرت ملي ستراتيژي جوړيدل مهم ګام ياد کړ او د ستراتيژۍ په ښه تطبيق کې يې د همکارو ادارو مرسته او همکاري اړينه و بلله؛ ښاغلي هاشمي وويل، چې دغه ناسته هم په همدې موخه د همکارو ادارو استازو سره په ګډه جوړه شوې؛ څو بهر ته د کارګرانو ليږلو د لايحې، ستراتيژۍ او تخنيکي کاري کمېټې د لا ښې همغږۍ په موخه خپل نظريات تخنيکي کاري کمېټې سره شريک کړي.
نوموړي زياته کړه چې هڅه کوو، څو د غيرقانوني کډوالۍ د مخنيوي په پار د هيوادوالو لپاره د قانوني کاري کډوالۍ زمينه برابره کړو .
غونډه کې د سلام پروژې مسؤلينو د يادې پروژې د کړنو او د کارونو د تنظيم او بشري قوې عمومي رياست مشر هم بهر ته د کارګرانو ليږلو اړوند خبرې و کړې او د همکارو ادارو په همکارۍ او ګډ کار يې ټينګار و کړ.
غونډه کې د مختلفو ادارو راغلو استازو هم خپلې پوښتنې، نظرياتو او وړانديزونه شريک کړل او د کډوالۍ ملي ستراتيژۍ د تطبيق په برخه کې يې د کار او ټولنيزو چارو وزارت سره د ګډ کار او همکارۍ ژمنې و کړې.
