۱۴۰۰ ښوونيز کال کې به شا او خوا اته سوه تنه زده کوونکي، افغان ـ کوريا انستيتوت کې د فني او حرفوي زده کړو مختلفو څانګو کې و روزل شي.
دغه خبرې د افغان ـ کوريا د فني او حرفوي زده کړو انستيتوت آمر مير جلال الدين هشام د ۱۴۰۰ ښوونيز کال پرانست غونډه کې و کړې.
نوموړي زياته کړه چې ۱۴۰۰ ښوونيز کال کې به شا او خو اته سوه تنه د نهم او دولسم صنف فارغانو( انجونې او هلکان) ته د دې انستيتوت اوو څانګو ( ساختماني، کمپيوتر، انګليسي، خياطي، برق، موټر ترميم او نلدواني) کې د مسلکي استادانو له خوا زده کړې وړاندې شي.
د کار او ټولنيزو چارو وزير بشير احمد ته ينج د نوي ښوونيز کال پرانست غونډه کې شاګردانو ته په خطاب وويل: خپلو درسونو ته په وخت حاضر، له دې فرصت څخه په ښه توګه ګټه پورته او يو مسلک په ښه توګه زده کړئ.
ښاغلي ته ينج زياته کړه: د دې انستيتوت او هيواد کې د نورو فني او حرفوي زده کړو مرکزونو فارغانو څخه به د يوې ځانګړې آزموينې اخيستلو وروسته د فني او حرفوي زده کړو معتبر تصديق ورکول کيږي، چې په کور دننه او له هيواده بهر به د اعتبار وړ وي.
غونډه کې د کاري چارو مرستيال سيدعبدالکريم هاشمي هم خبرې وکړې، و يې ويل: د کار بازار کې له مهارت پرته رقابت سخت دی؛ د کار او ټولنيزو چارو وزارت هڅه کوي، څو د فني او حرفوي زده کړو وړاندې کولو له لارې د کار بازار کيفيت لوړ او هيوادوالو ته له دې لارې د کار زمينه برابره کړي.
نوموړي همدارنګه وويل: هغه فارغان چې د فني او حرفوي زده کړو مرکزونو څخه فارغيږي، د کار او ټولنيزو چارو وزارت، له خوا بهر ته د کارګرانو د ليږد پروسې په لومړيتوب کې شامل دي.
د ويلو دی، چې افغان ـ کوريا د فني او حرفوي زده کړو انستيتوت کې ۸۰ سلنه درسونه عملي دي، چې د دې انستيتوت له رامنځ ته کېدو( ۲۰۰۴) تر دې مهاله نږدې اته زره شاګردان له ياد انستيتوت څخه فارغ او ټولنې ته د خدمت په موخه وړاندې شوي دي.
