د کابل په ولایت کې؛ روزنتونونو ته د یتیمو او بېسرپرسته ماشومانو د جذب په موخه د همغږۍ ناسته ترسره شوه
امارتي روزنتونونو ته د نورو یتیمو او بېسرپرسته ماشومانو د جذب په موخه؛ د کار او ټولنیزو چارو وزارت، د بګرامیو ولسوالی له سیمهایزو مقاماتو، ملکانو او د علماوو شورا له استازو سره مشورتي او د همغږۍ ناسته ترسره کړه.
غونډې ته د کار او ټولنیزو چارو وزارت د روزنتونونو رئیس مولوي محمداصغر صفدري په خپلو خبرو کې په ټولنه کې د یتیم د کفالت پر اهمیت، په ماشومتوب په عمر کې د هغوی ذهني ودې ته پر جدي پاملرنې او په ټوله کې د یتیمو او بېسرپرسته د غوره کفالت او حفاظت په تړاو خبرې وکړي او زیاته یې کړه: دا چې په ټولنه کې د یتیمو او بېسرپرسته ماشومانو تعدد او ستونزې زیاتې دي، د کار او ټولنیزو چارو وزارت خپلو امکاناتو ته په کتو غواړي چې تر ټولو زیات مستحق ماشومان خپلو روزنتونونو ته جذب کړي، چې په دې برخه کې د سیمهایزو مقاماتو، د قومي مخورو شورا او د علماوو شورا مرسته او همکاري اړینه ده.
غونډه کې؛ سیمهایزو مقاماتو، ملکانو او د علماوو شورا استازو؛ د یتیمو او بېسرپرسته ماشومانو د کفالت په اړه کار او ټولنیزو چارو وزارت او په ټوله کې د افغانستان اسلامي امارت هلې ځلې وستایلې او په دې ډګر کې یې د هر ډول همکاری ژمنې وکړي.
د یادولو وړ ده چې د دا ډول مستحقو یتیمو او بېسرپرسته ماشومانو د جلب او جذب په موخه به مشورتي او د همغږۍ ناستې د کابل ولایت په نورو سیمو او ولسوالیو کې هم ترسره شي.
