تورخم کې د کار او ټولنیزو چارو وزارت مؤظف تخنیکي ټيم، پرون هم ۸۴۷ تنه بیا راستانه شوي هېوادوال ثبت کړل

د افغانستان اسلامي امارت له لورې راستنیدونکو هیوادوالو د خدماتو د تنظیم لپاره توظیف شوې کمیټې سره په هم‌غږۍ او  د کار او ټولنیزو چارو سرپرست وزیر الحاج ملا عبدالمنان عمري د هدایت په اساس، تورخم ته د دې وزارت استول شوی تخنیکي ټیم پرون چهارشنبه  ۸۴۷ تنه  بېرته راستانه شوي هېوادوال د کاري فرصتونو او ټولنیزو خدماتو په پار په سیستم کې ثبت او هم یې په اړونده برخو کې هغوی ته لازم خدمات وړاندې کړل.
 د کار او ټولنیزو چارو وزارت د تخنیکي ټیم په وینا یادو کسانو کې  د قرآن عظیم‌الشان حافظان، بکلوریا، فوق بکلوریا، لسانس، فني او حرفوي کارګران او  غریب‌کار هېوادوال شامل دي.
یاد تخنیکي ټیم په تورخم کې له راستنیدونکو کورنیو سره د څو تنو ورکو شویو ماشومانو د یوځای کولو، د زیانمنو اقشارو څخه د ملاتړ، ترانسپورتي خدماتو، روغتیايي مراکزو ته د بیرته راستانه شویو لاسرسۍ، مختلفو برخو کې د عامه پوهاوي او اړینو مشاورو وړاندې کول او  د هغوی د انتقال په برخو کې هم خدمات ترسره کړي..
د یادولو ده چې  د کار او ټولنیزو چارو وزارت  د تخنیکي ټيم له لوې تر پرون چارشنبې ورځ پورې  ۸۵۵۸ تنه بېرته راستنېدونکي هېوادوال سیستم کې ثبت شويدي.