د کار او ټولنيزو چارو وزارت دريوو مؤسسو او د امام خميني د مرستو کميټې سره د همکارۍ تفاهم ليکونه لاسليک کړل

دغه تفاهم ليکونه نن د کار او ټولنيزو چارو وزارت سرپرست وزير ملا عبدالولي څارنوال( حاجي وارث) او د يادو مؤسسو مشرانو او استازو تر منځ لاسليک شول. 
د دغو هوکړه ليکونو له مخې؛ د کار او ټولنيزو چارو وزارت د ځوانانو روغتيايي او پرمختيايي مؤسسې سره د زيانمن شويو، له قاچاق سره مخ او بې سرپرسته ماشومانو څخه د ملاتړ؛ د حق خيريه بنسټ سره د پروان ولايت د دولتي روزنتون د اعاشوي مصارفو اړوند د همکارۍ؛ د آرزوی آينده خيريه مؤسسې سره د ميرزا حکيم روزنتون د فعاليت تمديدو او ارزوی آينده د انجونو روزنتون جوړولو اړوند همکارۍ او د امام خميني د مرستو کمېټې مسؤلينو سره د فني، حرفوي زده کړو او اړمنو کسانو څخه د ملاتړ برخو کې جلا جلا هوکړه ليکونه لاسليک کړل. 
د تفاهم ليکونو د لاسليک کولو پر مهال د کار او ټولنيزو چارو وزارت سرپرست ملا عبدالولي څارنوال( حاجي وارث) د يادو مؤسسو له مسؤلينو او استازو و غوښتل؛ څو خپل ټول کارونه د هوکړه ليکونو او اسلامي امارت د اصولو پر بنسټ پلي او د خپلو کړنو څخه وخت په وخت وزارت ته کاري راپور ورکړي. 
د تفاهم ليکونو د لاسليک کولو پر مهال د يادو مؤسسو استازو د مؤسسو د فعاليت او خدمتونو وړاندې کولو برخه کې د حکومت همکاري اړينه و بلله او په دې برخه کې يې د کار او ټولنيزو چارو وزارت څخه مننه وکړه؛ ژمنه يې وکړه، چې ټولې کړنې به د کار او ټولنيزو چارو وزارت رهبرۍ او اړوندو مسؤلينو سره په ښه همغږۍ او لارښوونه مخته وړي.