د افغانستان د خپلواکۍ سلمې کالیزې په ویاړ د کار او ټولنیزو چارو سرپرست پيغام!
د افغانستان خپلواک او اتل ولسه! السلام علیکم و رحمت الله و برکاته
د هیواد خپلواکۍ سلمې کالیزې په مناسبت خپل آزاد او خپلواک ولس ته د زړه له کومې مبارکي وایم.
لکه څنګه چې افغان غازیانو او مجاهدینو سل کاله وړاندې په ډیر زړه ورتوب او سرښندنو سره د خپل سر، وینې او مال په بیه د افغانستان خپلواکي ترلاسه کړه؛ مونږ ته هم پکار ده، چې له دغه ملي ارزښت څخه ساتنه وکړو او د تل لپاره یې په یاد وساتو.
له شک پرته چې غازي امان الله خان ( د هیواد آزاد او زړه ور پاچا) یوه پیړۍ وړاندې په خپل ټول شجاعت سره د آزادۍ رپانده بیرغ په لاس ونیوه او نړیوالو ته ېې څرګنده کړه، چې دا هیواد غلامي او اسارت ننګ بولي.
په پای کې زه او په کار او ټولنیزو چارو وزارت کې زما ټول همکاران د زمري ۲۸مه د افغانستان د خپلواکۍ سلمه کالیزه؛ سرلوړي او خپلواک ملت ته مبارک وایو.
بریالي او سرلوړي اوسئ!
