د کار چارو معین د ملګرو ملتونو پراختیایي پروګرام له مشر سره وکتل
د کار او ټولنیزو چارو وزارت د کار چارو معین مولوي محمد زاهد احمدزي د خپل کار په دفتر کې د ملګرو ملتونو پراختیایي پروګرام (UNDP) له مشر ښاغلي استیفن رودریکز او ورسره مل پلاوي سره وکتل. په کتنه کې د چارو معین مولوي محمد زاهد احمدزي مېلمنو ته د ښه راغلاست سربېره، وویل: لکه څرنګه چې تاسو پوهېږئ بېکاري یوه نړیواله ستونزه ده، د افغانستان اسلامي امارت دې ستونزې ته د رسېدنې په موخه د مرکز په ګډون په مختلفو ولایتونو کې د فني او حرفوي زدهکړو مراکز پرانیستي، ترڅو له دې لارې هېوادوالو په ځانګړې توګه ځوان قشر ته د بازار د اړتیاوو مطابق د زدهکړو زمینې برابرې کړي. همدارنګه مولوي محمد زاهد احمدزي د کار ملي کانفرانس په برخه کې د ترسره شویو پرمختګونو په اړه معلومات شریک او هیله یې وښوده چې د ملګرو ملتونو د پراختیايي پروګرام دې د کانفرانس په برخه کې خپلې تخنیکي سلا مشورې له دې وزارت سره شریکې کړي. ورپسې ښاغلي استیفن رودریکز د دې وزارت فعالیتونه وستایل او زیاته یې کړه: دا زموږ هیله ده، چې زموږ تخینکي ټیمونه د کار او ټولنیزو چارو وزارت سره په ګډه کار وکړي او د کار بازار تر مطالعې او څېړنې وروسته افغان وګړو ته مناسب کاري فرصتونه ایجاد شي. همداراز یې ژمنه وکړه چې په راتلونکي کې به د دوی پروژې د دې وزارت سره په همغږۍ په لرې پرتو سیمو کې هم پلي شي.
