له څلورو کورنیو او نړیوالو مؤسساتو سره د ۲۶۱میلیونه افغانیو په ارزښت هوکړه لیکونه لاسلیک شول؛
د کار او ټولنیزو چارو وزارت او د همکارو مؤسساتو ترمنځ مختلفو برخو کې د ۲۶۱میلیونه افغانیو په ارزښت ۸عنوانه هوکړه لیکونه لاسلیک شول.
د یادو هوکړه لیکونو د امضا په مراسمو کې د کار او ټولنیزو چارو وزارت د ټولنیزو چارو معین الحاج شیخ عبدالبر خپلو خبرو کې د همکارو مؤسساتو د مرستو څخه په مننې سره څرګنده کړه: دا چې افغانستان کې ډاډمن امنیت ټینګ او مختلفو برخو کې د خدماتو وړاندې کولو مناسب فرصت برابر دی باید په ګډه توګه او په ښه ډول خپل مسؤلیتونه ادا او د اړمنو هېوادوالو لاسنیوی وکړو. الحاج شیخ عبدالبر د خپلو خبرو په دوام زیاته کړه: له نېکه مرغه نن له څلورو کورنیو او نړیوالو مؤسساتو سره مو هوکړه لیکونه لاسلیک کړل، چې له امله به یې ۲۴۳۷تنو ته دفني او حرفوي زدهکړو زمینه برابره او ۴۶۰۰ تنو زیانمنونکو ماشومانو او د هغوی د کورنیو ملاتړ وشي او یادې پروژې به د پلازمېنې کابل په ګډون په اوو ولایتونو کې پلي شي.
په پای کې د مؤسساتو په استازولۍ د سرف افغانستان مؤسسې استازي غلام مجتبی رسولي خبرې وکړې او د کار او ټولنیزو چارو وزارت له لوري د هوکړه لیکونو د لاسلیک کېدو څخه په مننې سره ژمنه وکړه چې خپلې چارې به له دې وزارت سره په همغږۍ؛ خپلې اړونده پروژې په لازم ډول تطبیق کوي.
