سپین بولدک او تورخم ښارګوټي کې د ثبتشویو راستنېدونکو هیوادوالو وروستي ارقام
د افغانستان اسلامي امارت له لوري بېرته راستنېدونکو کډوالو ته د خدماتو د تنظیم کميټې سره په همغږۍ او د کار او ټولنیزو چارو سرپرست وزیر الحاج ملاعبدالمنان عمري د هدایت سره سم، د کندهار ولایت سپینبولدک او د ننګرهار ولایت تورخم ښارګوټي کې د دې وزارت مېشتو تخنیکي ټیمونو تېرو دوو ورځو کې ۶۵۸ تنه بېرته راستنېدونکي هېوادوال سیستم کې ثبت او مختلفو برخو کې یې هغوی ته خدمات وړاندې کړل.
د کار او ټولنیزو چارو وزارت تخنیکي ټیمونه توانیدلي چې د پنجشنبې او جمعې په ورځو کې د ننګرهار ولایت تورخم ښارګوټي کې ۲۳۳ تنه او د کندهار ولایت سپینبولدک ولسوالۍ کې ۴۲۵ تنه بېرته راستنېدونکي کډوال سیستم کې ثبت کړي، او هم د روغتیايي خدماتو، د ترانسپورت د تنظیم او د زیانمنو اقشارو څخه د ملاتړ په برخو کې د هغوی لاسنیوی وکړي. په همدې توګه یې تر ۲۰۰ تنو ماشومانو ته د افغانستان پېژندنې، رواني روغتیا او د نورو اړینو مواردو په اړه عامه پوهاوی ورکړی.
د یادولو وړ ده چې سیستم کې د هغوی د ثبتولو موخه د بېرته راستنېدونکو کډوالو د تعلیم او تحصیل د سویې معلومول او فني او حرفوي زدهکړو ته یې لاسرسی دی چې له دې لارې به په راتلونکي کې د کاري فرصتونو په برابرولو کې آسانتیاوې رامنځته شي، او له پورتینو ارقامو سره په تورخم ښارګوټي، سپینبولدک او انګور هډه کې د ثبتشویو راستنیدونکو هیوادوالو شمیر ۲۷۳۳۰تنو ته ورسید.
