کونړ کې د فني او حرفوي زده کړو څخه ۱۸۰ تنه فارغ شول
هغه غونډه چې په همدې موخه د کونړ ولايت روزنتونونو تالار کې جوړه شوې؛ په کې د کار او ټولنيزو چارو وزير بشير احمد ته ينج، مالي او اداري چارو مرستيال مسعودالله اورياخيل او ورسره مل پلاوي ترڅنګ د کونړ والي محمد اقبال سعيد، کونړ ولايتي شورا مشر، قومي مشرانو او د علماوو يو شمير استازو هم ګډون کړی وه.
غونډې ته د کار او ټولنيزو چارو وزير بشير احمد ته ينج په وينا کې، شاګردانو ته د مبارکۍ ترڅنګ فني او حرفوي زده کړې د کار موندنې او بې کارۍ کچې را ټيټولو برخه کې مهمې و بللې، زياته يې کړه، چې کونړ ولايت کې د ښو لرګيو په شتون سره د لرګي صنعت په برخه کې ښه فرصتونه شته؛ نوموړي ژمنه وکړه، چې دې برخې ته به جدي پاملرنه وکړي.
د کونړ والي محمد اقبال سعید د حرفوي زده کړو پروګرامونه د بې کارۍ او فقر مخنیوي برخه کې مهم وبلل او د وزارت له مشرتابه يې وغوښتل، چې د نورو مرستو ترڅنګ حرفوي زده کړو پروګرامونو ته لا زياته پراختيا ورکړي.
د کونړ ولایت د کار او ټولنیزو چارو رئیس عطا الله نوري؛ ياد ولايت کې د کار او ټولنيزو چارو رياست د کړنو، لاسته راوړنو او ستونزو بيانولو ترڅنګ وويل، چې روان کال( ۱۳۹۹) کې د وزارت ترڅنګ د IOM مؤسسې له خوا شل تنه او DRC مؤسسې له لوري هم ۱۶۹ تنه په بېلابېلو حرفو کې روزل او فارغ شوي دي.
دې غونډه کې د کنړ ولایتي شورا رئيس، دیني عالمانو، روزنتون استادانو او ځينو نورو مسؤلينو هم خبرې وکړ؛ ياد ولايت کې د کار او ټولنيزو چارو رياست اړوند ستونزې يې د وزارت رهبرۍ سره شريکې او د حل غوښتنه يې وکړه.
د ويلو دی، چې دغو ۱۸۰ تنو پنځه څانګو (لاسي صنایعو، برېښنا، د لرګیو ګلکارۍ، ویر ینګ او نل جوړونې) کې څلور میاشتنۍ زده کړې ترسره او نن ورته د مسؤلينو له لوري تصديق پاڼې و ويشل شوې.
د غونډې پای کې د کار او ټولنيزو چارو وزير، د کونړ والي او مل پلاوي د يونيسيف ادارې په مالي مرسته د کونړ مرکزي روزنتون زده کوونکو ته ژمنۍ بستې هم وويشلې.
