کندز کې له اعتیاد څخه رغېدلو کسانو ته د فني او حرفوي زدهکړو مرکز پرانېستل شو
د کندز ولايت کار او ټولنیزو چارو رياست له لوري؛ د یاد ولایت اړوند دشت آبدان سیمه کې ۶۰ تنه له اعتیاد څخه رغېدلو کسانو ته د بيکګنډلو او د برېښنايي وسایلو ترميم په حرفو کې د شپږمیاشتنیو نظري اوعملي زده کړو زمینه برابره شوه.
په همدې مناسبت جوړې شوې پرانېست غونډې ته د کندز ولایت د کار او ټولنیزو چارو رئیس مولوي احمدشاه حقاني په خپلو خبروکې وویل: د کار او ټولنیزو چارو وزارت دا خپل مسئولیت ګڼي، ترڅو په ټولنه کې له اعتیاد څخه رغېدلو کسانو ته په مختلفو برخو کې د فني او حرفوي زدهکړو زمینه برابره کړي، چې په دې سره به دوی وکولی شي هغوی د دوامداره کار روزګار څښتن شي.
همداراز نوموړي هغوی ته په خطاب کې وویل: چې دا ستاسو لپاره یو ارزښتناک فرصت دی؛ هڅه وکړئ له دې فرصت او وخت څخه ګټه واخلئ، بیا هېڅکله دې شومې پدیدې ته مخه مه کوئ او د خپلو کورنیو لپاره د حلالې نفقې ګټلو وسیله وګرځئ.
